” അതേല്ലോ…അതാണല്ലോ ഒന്ന് പോയി നോക്കാം എന്ന് ഞാനും കരുതിയത്… ”
ഞാൻ അമ്മയുടെ താടി തുമ്പ് പിടിച്ചു കൊണ്ട് ചിരിയോടെ പറഞ്ഞു…
” ആ അങ്ങനെ നല്ല കാര്യങ്ങൾ ചെയ്യ്…എന്നാ പെട്ടെന്ന് പോവാൻ നോക്ക്…പുലർച്ചെ അവിടെ പോകുന്നതാ നല്ലത്…വെറെ തന്നെ ഒരു രസാ… ”
പുള്ളിക്കാരി അനുഭവം പങ്കുവയ്ക്കും പോലെ പറഞ്ഞു… എന്നിട്ട് താഴത്തേക്ക് നടന്നു… അപ്പോഴായിരുന്നു ദിവ്യയും പുലർച്ചെ തന്നെ പോണം എന്ന് വാശിപിടിച്ചത് ഞാൻ ഓർത്തത്…അങ്ങനെ അതികം ചിന്തിച്ച് നിൽക്കാതെ പെട്ടന്ന് തന്നെ ഫ്രഷായി ഒരു നീല ഷർട്ടും വെള്ള മുണ്ടും എടുത്തുടുത്തു… അല്ലെങ്കിലും അമ്പലത്തിൽ പോകുമ്പോൾ ഞാൻ മുണ്ടാണ് ഉടുക്കാറ്…അങ്ങനെ പെട്ടന്ന് തന്നെ ഒരുങ്ങി ഞാൻ താഴേക്കിറങ്ങി അപ്പൊ എൻ്റെ വേഷം കണ്ട് അമ്മ അടിപൊളി എന്നൊരു കമൻ്റും തന്നു…അങ്ങനെ അമ്മ തന്ന ഒരു ചുക്ക് കാപ്പിയും കുടിച്ച് വേഗം വണ്ടി അവളുടെ തറവാടിന് മുന്നിലേക്കെടുത്തു…
പുലർച്ചെ ആയോണ്ട് വാഹനം ഒന്നുമില്ലാത്തത് കൊണ്ട് പെട്ടെന്ന് തന്നെ എത്തി…അപ്പോൾ ഗേറ്റിനടുത്ത് ഒരു സെറ്റ് സാരിയിൽ എന്നേയും കാത്ത് അവളുണ്ടായിരുന്നു…വെട്ടം അത്രയ്ക്കങ്ങ് വീണിറ്റില്ല…ഞാൻ വണ്ടി ഗേറ്റിന് മുന്നിലായി നിർത്തിയതും പെണ്ണ് വേഗം ചാടി കേറി…
” പെട്ടെന്ന് വിട്…ആരും കാണണ്ടാ….അവരൊക്കെ ഉറക്കാ… ”
പുറകീന്ന് അവൾ തിടുക്കം കൂട്ടി…
” എന്തോന്നെടി അതിന് ഇതെന്താ ഒളിച്ചോട്ടവൊ… ”
ഞാൻ മിററിലൂടെ അവളെ നോക്കി ചോദിച്ചു…
” പിന്നെ ഇത്ര രാവിലെ എന്നേം കൂട്ടി അമ്പലത്തിൽ പോകാൻ ഇയാളാരാ എൻ്റെ ഭർത്താവോ…ഞാൻ കൂട്ടുകാരിയുടെ ഒപ്പം പോന്നെന്നാ ഇന്നലെ പറഞ്ഞത്… അതോണ്ട് പുരാണം പറഞ്ഞ് അവരെ ഉണർത്താതെ വണ്ടി വിട് മോനെ ദിനേശാ… ”
അവള് ചുറ്റും നോക്കിയതിന് ശേഷം പറഞ്ഞു…അതോടെ കാര്യം ഏതാണ്ട് എനിക്കും കത്തി…പറഞ്ഞത് ശരിയല്ലേ…അതോടെ ഞാൻ വേഗം വണ്ടി മുന്നോട്ടെടുത്തു…
” മ്മ് എന്താലും…ഒരു ഒളിച്ചോട്ടത്തിൻ്റെ വൈബുണ്ട്…പുലർകാലം… അതും വീട്ടുകാരറിയാതെ…ഒപ്പം സെറ്റ് സാരി… ഇനി ഒരു താലിയുടെ കുറവ് കൂടെ ഉള്ളു… ”
ഞാൻ വണ്ടിയോടിക്കുമ്പോൾ ആരോടെന്നില്ലാതെ പറഞ്ഞു…അത് കേട്ട് പുറകീന്ന് അവൾ കുണുങ്ങി ചിരിക്കുന്നത് കേട്ടു…
