ഇന്ദു എന്നോട് എന്തോ ചോദിക്കാനായി നാവുയർത്തി… അപ്പോഴേക്കും രാജീവേട്ടനും മനോജേട്ടനും എത്തി… ഇന്ദു ഉയർത്തിയ നാവ് അതേപടി അടക്കി വച്ചു… അപ്പോഴാണ് സന്ധ്യ കടയ്ക്കകത്തെ കോണിപ്പടികൾ ഇറങ്ങി വരുന്നത്… അവൾ സ്റ്റെയറിന്റെ ലാൻഡിംഗിൽ നിന്നു…
“ഇന്ദൂ… ഒന്നിങ്ങു വന്നേ… ഒരു കാര്യം പറയട്ടെ….” സന്ധ്യ വിളിച്ചു…
ഇന്ദു ചെയ്തു കൊണ്ടിരുന്ന ജോലി മതിയാക്കി എഴുന്നേറ്റു സന്ധ്യയുടെ അരികിലേക്കു ചെന്നു… പിന്നെ അവർ രണ്ടു പേരും കൂടി മുകളിലേക്ക് കയറിപ്പോയി….
“എന്താടാ പ്രശ്നം?… ഇന്നലെ മുതൽ തുടങ്ങിയതാണല്ലോ രണ്ടും…” രാജീവേട്ടൻ വക ചോദ്യം എന്നോട്…
“ആ… എനിക്കറിയില്ല… നൂറു കൂട്ടം പണീടെ ഇടയ്ക്കല്ലേ കോപ്പ് അന്വേഷിക്കാൻ പോണത്…” ഞാൻ ഒട്ടും താൽപര്യം ഇല്ലാത്ത പോലെയാണ് പ്രതികരിച്ചത്…..
പറഞ്ഞു നിക്കാലെ രമ്യ വന്നു… അവൾ വന്ന പാടെ ബാഗ് വച്ച് മുകളിലേക്ക് പോകാനൊരുങ്ങി…
“ഏതേലും ഒരെണ്ണം പൊട്ടിച്ചോ കെട്ടോ… ഇന്ദു അവിടെ ഉണ്ട്… ചേച്ചിമാര് വന്നു കഴിഞ്ഞാൽ ഞാനും അങ്ങോട്ടു വരാം…” ഞാൻ രമ്യയോടായി പറഞ്ഞു…
അവൾ തലയാട്ടിക്കൊണ്ട് മുകളിലേക്ക് പോയി… ഞാൻ ഇന്ദു പാതിയിൽ ഇട്ടു പോയ പണി ചെയ്തു തീർത്തപ്പോഴേക്കും ചേച്ചിമാർ എത്തി… താഴത്തെ നില അവരെ ഏൽപ്പിച്ച് ഞാനും രാജീവേട്ടനും മനോജേട്ടനും മുകളിലേക്ക് പോയി…
“ആരെങ്കിലും വരുവാന്നേൽ ഒന്നു വിളിച്ചേച്ചാ മതീട്ടോ ചേച്ചീ…” പോകുന്ന പോക്കിൽ രാജീവേട്ടൻ രണ്ടാളോടുമായി പറഞ്ഞു…
ഞാൻ റേറ്റിംഗ് കൗണ്ടറിൽ കയറി ഇരുന്നു… ഞാൻ ഇന്ദുവിന്റെ മുഖത്തേക്കു നോക്കി… ഇന്ദുവിന്റെ മുഖം കടന്നൽ കുത്തിയ പോലെ ‘ഭും’ എന്നിരിക്കുന്നു… മിണ്ടാട്ടമില്ല…
“പിണക്കത്തിലാന്നോ?…” ഞാൻ ചോദിച്ചു…
