“അതേ സാർ.” ശേഷം അലി താൻ മെക്കാനിക്കിന് തന്നെ പരിചയപ്പെടുത്തിയത് എങ്ങനെയാണെന്ന് കൂടി വിശദീകരിച്ചു.
“എന്തായാലും ഞാനയാളെ ഒന്ന് കാണട്ടെ.?” അരുൺ അകത്തേക്ക് നടന്നു കൊണ്ട് പറഞ്ഞു. അലിയും അയാളെ അനുഗമിച്ചു.
“ഇതാണോ നീ പറഞ്ഞ സുഹൃത്ത്.” അരുണിനെയും കൊണ്ട് അലി വരുന്നത് കണ്ടപ്പോൾ മെക്കാനിക്ക് ചോദിച്ചു.”
“അല്ല സാർ ഏട്ടനാണ്.” അലി മറുപടി നൽകി.
“ഓകെ ഇത് എന്താണ് ചെയ്യേണ്ടത് പുതിയ ഹാർഡ് ഡിസ്ക് ഇടണോ.?”
“അത് ഇല്ലാത്തത് കൊണ്ടാണോ ലാപ്ടോപ്പ് ഓൺ ആവാതിരുന്നത്.”
“അതേ. ഹാർഡ് ഡിസ്കിലാണ് കമ്പ്യൂട്ടറിലെ എല്ലാ സോഫ്റ്റ് വെയറുകളും ഇൻസ്റ്റാൾ ചെയ്ത് വെക്കുന്നതും ഡാറ്റ സ്റ്റോർ ചെയ്യുന്നതും.”
“ഓകെ എങ്കിൽ 1 TB യുടെ ഹാർഡ് ഡിസ്ക് തന്നെ ഫിറ്റ് ചെയ്തോളൂ.”
“സാർ അതിന് 7000 പ്ലസ് സർവീസ് ചാർജ് വരും കെട്ടോ.”
“അത് സാരമില്ല. എന്തായാലും ലാപ് ടോപ്പിൽ കൂടുതൽ സ്റ്റോറേജ് സ്പേസ് കിടക്കട്ടെ.”
“എങ്കിൽ മറ്റന്നാൾ വൈകുന്നേരം വന്നോളൂ. അപ്പോഴേക്കും ഞാൻ സാധനം റെഡി ആക്കി വെക്കാം.”
“ശരി.” അരുണും അലിയും അയാളോട് യാത്ര പറഞ്ഞ് ഇറങ്ങി. അവർ അവിടുന്ന് നേരെ പോയത് അരുണിന്റെ വീട്ടിലേക്കായിരുന്നു.
“സാർ നമുക്കെത്രയും പെട്ടന്ന് തന്നെ ആ വോയ്സ് റെക്കോർഡറിൽ ഉള്ള വിവരങ്ങൾ അറിയണം. ഒരു പക്ഷേ അത് തന്നെയാവാം ലാപ് ടോപ്പിലും ഉണ്ടായിരുന്നത്.”
“എന്നാലും ആ ലാപ് ടോപ്പിന്റെ ഹാർഡ് ഡിസ്ക് ആരായിരിക്കും അഴിച്ചെടുത്തത്.” അരുൺ നിരാശയോടെ ചോദിച്ചു.
“സാർ അത് സാറ് അന്വേഷിക്കുന്ന കേസിലെ പ്രതികൾ തന്നെയാവാം. അത് കൊണ്ടാണല്ലോ അവർ നന്ദൻ മേനോനെ കൊന്നത്.”
“എന്നിട്ട് അവരെന്ത് കൊണ്ട് വോയ്സ് റെക്കോർഡർ എടുത്തില്ല.”
“സാറേ അതിനവർ ലാപ്ടോപ്പും എടുത്തിട്ടില്ല. സാറാദ്യം അതൊന്ന് കമ്പ്യൂട്ടറുമായൊന്ന് കണക്ട് ചെയ്ത് നോക്ക്. ഒരു പക്ഷേ അതുമവർ നശിപ്പിക്കാനിടയുണ്ട്.”
“ഓഹ് അത് ഞാനോർത്തില്ല.”
“അല്ല സാറ് നന്ദന്റെ ഫോണെടുത്ത് പരിശോദിക്കുന്നത് കണ്ടല്ലോ.? എന്തായിരുന്നു നോക്കിയത്.”
