മുഖോം വീർപ്പിച്ചെന്നെയൊന്ന് നോക്കിയതല്ലാതെ അവൾ അതിന് മറുപടി തന്നില്ല.
അപ്പോ പ്രശ്നം ഗുരുതരമാണ്.
അവിടേക്ക് വന്ന അഭിരാമിയോട് ഞാൻ കണ്ണ് കൊണ്ട് ഇതെന്താ സംഭവം എന്നമട്ടിൽ ആംഗ്യമിട്ടു.
അതിനവളും തിരിച്ച് എന്തോ പറയാൻ ശ്രമിച്ചു എങ്കിലും ഒരുമാതിരി എന്നെ കൊഞ്ഞനം കുത്തി കാണിച്ചപോലെയാണ് എനിക്ക് തോന്നിയത്.
ഞാൻ അവിടന്ന് പയ്യെ വലിഞ്ഞു.
“”എന്താണ് പ്രശ്നം?!.””
എനിക്ക് പിന്നാലെ വന്ന അഭിരാമിയോട് ഞാൻ തിരക്കി.
“” ഇന്ന് മുഴുവൻ അവൾടെ കൂടെ കറങ്ങാന്ന് പറഞ്ഞയാള് ഉച്ചവരെ കിടന്നുറങ്ങിയേന്റെ ദേഷ്യവാ..! അവള് കുറേവട്ടം വന്ന് വിളിച്ചായിരുന്നു.!””
“”ഓഹ് ഷിറ്റ്…!””
ഞാൻ ആ കാര്യം മറന്നുപോയിരുന്നു. അവൾടെ അടുത്ത് സെന്റിയടിച്ചിട്ട് കാര്യമില്ല. ഏൽക്കില്ല.!
പ്രലോഭനം..! ലതിലാണ് ഇനിയുള്ള പ്രതീക്ഷ.
“” ഡീ അല്ലീ…! നീ കറങ്ങാനൊക്കെ പോവാന്ന് പറഞ്ഞിട്ട് എന്തേ റെഡിയാവാഞ്ഞേ…! “”
അതിനെന്നെ ഒന്ന് തറപ്പിച്ച് നോക്കീട്ട് അവള് മുഖംതിരിച്ചു.
“” ഓഹ് അത്ര ജാഡ ആണേ വരണ്ട.! അഭിരാമീ…നീ ചെന്ന് റെഡിയാവ്. നമുക്ക്പോയി പാരീസീന്ന് മട്ടൻ ബിരിയാണിയൊക്കെ കഴിച്ചിട്ട് ഒന്ന് കറങ്ങീട്ടൊക്കെ വരാം.! “”
അല്ലിയെ ഒന്ന് മൂപ്പിക്കാനായി അവളേം ഒളിക്കണ്ണിട്ട് നോക്കി ഞാൻ അഭിരാമിയോടായി പറഞ്ഞു.
നിങ്ങടെ പ്രശ്നത്തിൽ എന്നെയെന്തിനു വലിച്ചിടുന്നു എന്നരീതിക്കൊരു നോട്ടം അഭിരാമിയിൽനിന്ന് വന്നു. അവളുടെ മുഖത്തും ഒരു ചിരിയുണ്ട്.!
ബിരിയണീന്ന് കേട്ടാ അല്ലി വീഴും. അല്ലേലും ബിരിയാണി ഇഷ്ടല്ലാത്ത മലബാറുകാരുണ്ടാവോ?. അതും നല്ല തലശ്ശേരി ദം ബിരിയാണി!.
ഓൾഡ് പാരീസ് റെസ്റ്റോറന്റ്ലെ മട്ടൻ ബിരിയാണി അല്ലീടെ ഫേവറേറ്റ് ആണ്.
ബിരിയാണീന്ന് കേട്ടതും അവൾക്കൊരു ചാഞ്ചാട്ടമൊക്കെ സംഭവിച്ചിട്ടുണ്ട്. എന്നാലും ഞാനവളെ മൂപ്പിക്കാൻ പറയുവാന്ന് അറിയുന്നോണ്ട് അതങ്ങ് സമ്മതിച്ചുതരാൻ അവൾക്ക് കഴിയുന്നുമില്ല. എന്തായാലും കുറച്ച് കഴിഞ്ഞപ്പോ ഒന്നും മിണ്ടാതെ എണീറ്റ് റൂമിലേക്ക് പോയി അവൾ. റെഡി ആവാൻ തന്നേ.!
“നീ വരണില്ലേ.?”
സോഫേൽ ചെന്നിരുന്ന അഭിരാമിയോടായി ഞാൻ തിരക്കി.
