” അപ്പൊ പിന്നെ ഞാനാർക്കാ ഇത് ഉണ്ടാക്കുന്നേ…?? നിങ്ങൾ പോയി വന്നിട്ട് ഉണ്ടാക്കാം ബാക്കി….”
ആന്റി ആ പരിപാടി തന്നെ ഉപേക്ഷിച്ചു…ഞാൻ മേല് കഴുകാനായി അവിടെ നിന്നും പോന്നു….
കുളിച്ചു റെഡിയായി ഞാൻ ഉമ്മറത്തിരുന്നു ….പെണ്ണുങ്ങൾ രണ്ടും കൂടി കുളിയും പുറപ്പെടലും ഒക്കെ എന്തായോ എന്തോ …ഒരാളെയും ഇതുവരെ കണ്ടില്ല…..അമ്മ വന്നു അല്ലറ ചില്ലറ കാര്യങ്ങളൊക്കെ ചോദിച്ചു, ഞാൻ അതിനുള്ള മറുപടിയും കൊടുത്തു….അര മണിക്കൂറോളം കഴിഞ്ഞപ്പോൾ മഞ്ജിമ വന്നു പോവാമെന്നു പറഞ്ഞു വിളിച്ചു ,ഞങ്ങൾ ഇറങ്ങി അഞ്ജുവിനെ നോക്കിയപ്പോൾ ആ തെണ്ടി ഇതുവരെ മുറിവിട്ട് വന്നിട്ടില്ല ,അവിടെ വീണ്ടും 15 മിനിറ്റ് കാത്തിരുന്നു ബോർ അടിച്ചു….ഒടുവിൽ അവൾ വന്നപ്പോൾ നന്നായിട്ട് കലിപ്പ് തീർത്തു….
അമ്പലത്തിന്റെ അവിടേക്ക് എത്തുന്നതിനു മുൻപ് തന്നെ ഞാൻ കണ്ടു ഒരു മഞ്ഞ പട്ടുപാവാടയിട്ടു മുടി ഉള്ളത് മുഴുവൻ ചുമ്മാ ഒരു സൈഡിലൂടെ മുന്നിലേക്കിട്ട് ചുണ്ടിൽ എന്നെ എപ്പോളും മയക്കാറുള്ള പതിവ് പുഞ്ചിരിയുമായി ഉള്ളിലെ പടിക്കെട്ടിനരികിൽ കാത്തുനിൽക്കുന്ന അമ്മുട്ടിയെ….അവളെ കണ്ട മാത്രയിൽ എനിക്ക് ഒരായിരം ചിത്രശലഭം ചുറ്റിനും പറക്കുന്ന ഒരു അനുഭൂതി തോന്നിപ്പോയി….ഞാൻ അറിയാതെ അവളെത്തന്നെ കണ്ണിമയ്ക്കാതെ നോക്കി ചിരിച്ചുകൊണ്ടാണ് മുന്നോട്ടു നടന്നത്…..
” എടീ അഞ്ജൂ , നീ എലി പുന്നെല്ല് കണ്ട ചിരി കണ്ടിട്ടുണ്ടോ…? ”
ഒപ്പം നടക്കുന്ന മഞ്ജിമ അഞ്ജുവിനെ തോളിൽ തട്ടിക്കൊണ്ടു ചോദിച്ചു …പൊട്ടിചിരിച്ചുകൊണ്ടു അഞ്ചു അവൾക്കു ഹൈ ഫൈ കൊടുത്തു …എനിക്ക് ദേഷ്യമാണ് വന്നത്……
” ഒരു കാര്യം ഞാൻ പറഞ്ഞേക്കാം ….എനിക്കിട്ടു പണിയാനാണ് ഭാവമെങ്കിൽ രണ്ടിന്റേം തല ഞാൻ തല്ലിപ്പൊളിക്കും….അതിലൊരു സംശയോം വേണ്ട..”
ഞാൻ രണ്ടിനേം നല്ല ദേഷ്യത്തിൽ തന്നെ ഭീഷണിപ്പെടുത്തി….
” അമ്പമ്പോ…..!! ഇത് കൊള്ളാലോ , എടീ മാഷായപ്പോ നമ്മടെ ഏട്ടൻ വല്ല്യേ ചൂടനായിപ്പോയല്ലോ…”
അഞ്ചു കൃത്രിമ അമ്പരപ്പിൽ എന്നെ കാണിച്ചുകൊണ്ട് മഞ്ജിമയോട് പറഞ്ഞു….എന്റെ ക്ഷമ വിട്ടെങ്കിലും അമ്മുവിൻറെ അടുത്തെത്തിയതിനാൽ ഞാനൊന്നും പറഞ്ഞില്ല….ആദ്യം ചിരിച്ചാണ് നിന്നിരുന്നതെങ്കിലും എന്റെ മുഖത്തെ ഗൌരവം കണ്ടു അമ്മു കണ്ണുകൊണ്ട് എന്താ എന്ന ഭാവത്തിൽ ചോദിച്ചു…ഞാൻ ഒന്നുമില്ലെന്നും മറുപടി കൊടുത്തു ….
കാത്തുനിന്ന അവളെ കടന്നു ഞാൻ ഷർട്ടൂരി അമ്പലത്തിനുള്ളിൽ കേറുമ്പോൾ അമ്മു അമ്പരപ്പിലും കുറച്ചു സങ്കടത്തോടെയും എന്നെ നോക്കി…..ഉള്ളിലേക്കു കേറുന്ന സമയത്ത് തിരിഞ്ഞുനോക്കിയപ്പോൾ അവർ മൂന്നും കൂടെ എന്തോ കുശുകുശുക്കുന്നുണ്ട്…..
