വെട്ടിന്റെ ആഴവും ബലവും കുറച്ചു പയ്യെ ഞാനാ പന തിന്നു തുടങ്ങി…
അന്നത്തെ പണി കഴിഞ്ഞു പാതിബോധത്തിലാണ് വന്നു വീട്ടിൽ കയറിയത്,…
അമ്മു എനിക്ക് മുന്നേ എത്തിയിരുന്നു പെണ്ണ് ഓരോ വിശേഷം പറഞ്ഞു ചെവി തിന്നുമ്പോളും, എന്റെ കണ്ണ് ഇന്നത്തെ പണിയുടെ ക്ഷീണത്തിൽ അടഞ്ഞു പോവുന്നുണ്ടായിരുന്നു,…
അവസാനം ഷോപ്പിലെ പണി കൂടുതൽ ആയതുകൊണ്ട് ക്ഷീണം ആണെന്ന് പറഞ്ഞു അവളെ ഒതുക്കി റൂമിലെ ബെഡിലേക്ക് വീണതും ഞാൻ ഉറങ്ങിപ്പോയി.
രാത്രി അത്താഴം കഴിക്കാൻ കുലുക്കി വിളിച്ച അവളോട്‌ വേണ്ടാന്ന് പറഞ്ഞെങ്കിലും അതൊന്നും അവള് കേട്ടില്ല എന്നെ കുത്തിപ്പൊക്കി തീറ്റിച്ചിട്ടെ അവള് ഉറങ്ങാൻ വിട്ടുള്ളൂ….
പിറ്റേന്ന് ഉണർന്നതും ഈ പണിക്ക് ഇനി പോണോ എന്നു ഞാൻ ചിന്തിക്കാതെ ഇരുന്നില്ല,…
പക്ഷെ കുളിച്ചൊരുങ്ങി ചുരിദാറും ഇട്ട് എന്റെ മുൻപിൽ ചിരിയോടെ നിക്കുന്ന അമ്മുവിന്റെ മുഖം കണ്ടതും,….കിടന്നിടത്തുനിന്ന് ചാടിപ്പിടിച്ചു എഴുന്നേറ്റു,…
പിന്നേം അവളുടെ കൊഞ്ചലും വർത്താനോം ഇന്നലെ ഞാൻ ഉറങ്ങിപ്പോയതുകൊണ്ടു എന്നോട് പറയാൻ പറ്റാതിരുന്ന ക്ലാസ്സിലെ വിശേഷവും എല്ലാം പറഞ്ഞുകൊണ്ടു ബസ് സ്റ്റോപ്പിലെത്തി,…
കേറും മുന്നേ ഒരു ഇരുന്നൂറ് രൂപ അവളുടെ കയ്യിൽ കൊടുത്തു വിട്ടു…
എന്തെങ്കിലും ആവശ്യം ഉണ്ടെങ്കിലോ…
ബാക്കി നാന്നൂറ് കയ്യിൽ ഉണ്ട്…
എന്റെ ബസും കാത്തു നിൽക്കുമ്പോൾ ശരീരം വേദന ഉണ്ടെങ്കിലും മനസ്സിന് വല്ലാത്ത സുഖം ആയിരുന്നു…
***********************************
മണിയേട്ടന്റെ കൂടെ ഇപ്പൊ ഒരു മാസത്തോളം ആയി ആദ്യമുണ്ടായിരുന്ന ബുദ്ധിമുട്ടൊക്കെ ഇപ്പൊ ശീലങ്ങളായി, അതിന്റെ ഓരോ ബോണസ് എന്നോണം കയ്യിലും കാലിലും എല്ലാം ഓരോ മുറിവും പാടും ഒക്കെ നിറഞ്ഞു,…ഇതെല്ലാം കണ്ടു പിടിച്ചു പെണ്ണ് ചോദിക്കുമ്പോൾ കള്ളം പറഞ്ഞു ഊരിപ്പോരാനാ പാട്,…സൂപ്പർമാർക്കറ്റ് നുണ തന്നെ അർജ്ജു്നോടും നുണയനോടും മനീഷിനോടും രാഹുലിനോടും കാച്ചി,…അവസ്‌ഥ ഇതായിരുന്നതുകൊണ്ടു അവന്മാരും അത് വിശ്വസിച്ചു.
പിന്നെ ജിമ്മിൽ പോവാതെ തന്നെ ബോഡിയും ഒന്നു സെറ്റ് ആവുന്നത് കണ്ട ഞാനും ഹാപ്പി…
അമ്മു ഇപ്പൊ ഓരോ എക്സാം ഒക്കെ എഴുതുന്നുണ്ട്,….
ഇടയ്ക്ക് ഞങ്ങൾ രണ്ടും അച്ഛനെയും അമ്മയെയും പോയിക്കാണും,,…ഇതിനിടയിൽ ആഹ് നാറിയുടെ കല്യാണം കേമമായി തന്നെ നടന്നു,….
