ആലോചിയ്ക്കുമ്പോൾ വല്ലാത്തൊരു ഭയം.! എന്തൊക്കെയോ സംഭവിയ്ക്കാൻ പോകുവാണെന്നൊരു തോന്നൽ.!
സ്വന്തം കുടുംബത്തെത്തന്നെ പേടിയ്ക്കേണ്ടി വരുന്നതിന്റെ ഭീകരത അനുഭവിച്ചറിയുകയായിരുന്നു ഞാനപ്പോൾ..
പിന്നെയെഴുന്നേറ്റ് ഫ്രഷായി താഴേയ്ക്കിറങ്ങുമ്പോൾ വല്യച്ഛൻ ദേവൻചെറിയച്ഛനുമായി എന്തോ കൊടികുത്തിയ ചർച്ചയിലായിരുന്നു…
“”…ആദിത്യനല്ല ഇനിയവന്റെ തന്ത ചിറകുംവിരിച്ചു വന്നാപ്പോലും ശ്രീധരന്റെമേലൊരു മണ്ണുനുള്ളിയിടാൻ പറ്റില്ല… അതുകൊണ്ടു നീയതുവിട് ദേവാ..!!”””_ ചെറിയച്ഛനോടതും പറഞ്ഞു തലചെരിച്ചതും വല്യച്ഛനെന്നെ കണ്ടു… അപ്പോഴൊന്നു പരുങ്ങിയ വല്യച്ഛൻ വിഷയംമാറ്റാനെന്നോണം,
“”…ആഹാ.! കല്യാണച്ചെക്കനിങ്ങെത്തിയല്ലോ..!!”””_ എന്നൊരു പറച്ചിലായിരുന്നു… ശേഷം,
“”…ദേവാ… നീ വേണുവിനെ വിളിച്ച് കാര്യങ്ങളൊക്കെ പെട്ടെന്നു നീക്കാൻ ബലരാമനോടു പറയണം… കൂടുതൽ വൈകിപ്പിയ്ക്കണ്ടന്നാ അമ്മ പറഞ്ഞത്..!!”””_ എന്നു കൂട്ടിച്ചേർക്കുവേം ചെയ്തു.. അതിന്
“”…ശെരി വല്യേട്ടാ..!!”””_ ന്ന് മറുപടിയും പറഞ്ഞെഴുന്നേറ്റ ചെറിയച്ഛൻ,
“”…നീ രാവിലേയിതെങ്ങോട്ടാ..?? ഇന്ന് ഓഫീസിൽ പോണ്ടാ, എന്റൊപ്പം മില്ലിലേയ്ക്കു വരാൻ ഞാൻ പറഞ്ഞതല്ലേ..??”””_ എന്നും ചോദിച്ചെന്റെ മുഖത്തേയ്ക്കു നോക്കി…
“”…ചെറിയച്ഛാ… അതുപിന്നെ… ഇന്നൊരു ക്ലൈന്റിനെ കാണാനുണ്ട്… ജൂണ രാത്രിയാ ഇൻഫോംചെയ്തത്… അതാ ചെറിയച്ഛനോട്‌ പറയാൻ പറ്റാഞ്ഞത്..!!”””_ ഒന്നു വിക്കിയെങ്കിലും ഞാൻ പറഞ്ഞൊപ്പിച്ചു…
“”…ആഹ്.! എന്നാ പോയിട്ടു വാ… പിന്നെ വല്ലതും കഴിച്ചിട്ടുപോണം… ഇന്നലെ രാത്രി നീയൊന്നും കഴിച്ചില്ലാന്ന് ശോഭപറഞ്ഞു..!!”””_ ചെറിയച്ഛൻ ആ പറഞ്ഞതിനൊന്നു മൂളിയെന്നു വരുത്തി ഡയനിങ്ഹോളിലേയ്ക്കു നടക്കുന്നതിനിടയിൽ ഞാനൊരിയ്ക്കൽക്കൂടി വല്യച്ഛനെ തിരിഞ്ഞുനോക്കുമ്പോൾ ആള് ഗഹനമായ പത്രം വായനയിലാണ്… എന്നെയൊന്നു നോക്കുന്നു പോലുമില്ല..
അതിനർത്ഥം പുള്ളിയൊന്നും അറിഞ്ഞിട്ടില്ലാന്നാണോ..??
എന്തായാലും ഇന്നവളെക്കാണുമ്പോൾ എന്താണു നടന്നതെന്നൊരു തീർപ്പാകുമല്ലോ.. അതിനുശേഷം എന്തു വേണമെന്നാലോചിയ്ക്കാം..
അങ്ങനെയുംകരുതി ഡൈനിങ് ടേബിളിനുമുന്നിലെ ചെയറിലിരിയ്ക്കുമ്പോൾ കല്യാണിയാന്റി ബ്രേക്ക്‌ഫാസ്റ്റ് വിളമ്പി… അതു കഴിയ്ക്കുന്നതിനിടയിലാണ് ജൂണയുടെ വരവ്…
പതിവിനു വിപരീതമായി ഇളംനീല നിറത്തിലൊരു ചുരിദാറായിരുന്നു അവളുടെ വേഷം… അവളെക്കണ്ടതും,
“”…ആഹ്.! നീയെത്തിയോ..?? എടീ… നീ കഴിച്ചതാണോ..?? ഇല്ലേലിരിയ്ക്ക്… ഞാൻ ദോശയെടുക്കാം..!!”””_ ന്ന് പറഞ്ഞുകൊണ്ട് ആന്റിയകത്തേയ്ക്കു തിരിഞ്ഞു…
“”…വേണ്ടാന്റീ… ഞാൻ കഴിച്ചിട്ടായിറങ്ങിയെ..!!”””_ പറഞ്ഞശേഷം അവളെന്റടുക്കെ വന്നിരുന്നു…
“”…നീയാ ന്യൂസ് റിപ്പോർട്ട് കണ്ടായ്രുന്നോ..??”””_ മെല്ലെയവൾ ചോദിച്ചതിന് ഞാൻ തലകുലുക്കി… ശേഷം വല്യച്ഛനിരിയ്ക്കുന്നത് കണ്ണുകൊണ്ട് ആംഗ്യം കാണിയ്ക്കുകയും ചെയ്തു…
