ഐശ്വര്യയും, നമിതയും വീട്ടുമുറ്റത്ത് ഇരുന്ന് മഞ്ചാടി കുരുവച്ച് കളിക്കുകയാണ്.
” എനി രണ്ട് ദിവസം കൂടി കഴിഞ്ഞാൽ വിഷുവായി ബന്ധുക്കളൊക്കെ നല്ലൊരു തുക കൈനീട്ടമായി തന്നാൽ മതിയാരുന്നു. ” നമിത പറഞ്ഞു.
” കേശവൻ മാമന്റെ പൈസ കൊടുത്തു തീർക്കണ വരെ മനസ്സിന് ഒരു സ്വസ്ഥതയുമില്ല.. ” ഐശ്വര്യ പറഞ്ഞു.
പെട്ടന്നാണ് ഐശ്വര്യയുടെ അമ്മ വിജില ഉറക്കെ നിലവിളിക്കുന്നത് കേട്ടത്. ഉടനെ കളി അവസാനിപ്പിച്ചു ഐശ്വര്യയും, നമിതയും ഐശ്വര്യയുടെ വീട്ടിലേക്ക് ചെന്നു. അകത്ത് നമിതയുടെ അമ്മ പാർവതി വിജിലയെ ചേർത്ത് പിടിച്ചു സമാധാനിപ്പിക്കുകയാണ്. എന്താ സംഭവിക്കുന്നതെന്ന് മനസ്സിലാകാതെ ഐശ്വര്യയും, നമിതയും പേടിയോടെ നിന്നു. അപ്പോഴാണ് നമിതയുടെ അച്ഛൻ സോമൻ വീട്ടുമുറ്റത്ത് വന്നു നിൽക്കുന്നത് കണ്ടത്. ഉടനെ ഇരുവരും സോമന്റെ അടുത്തേയ്ക്ക് ചെന്നു.
” എന്താ അച്ഛാ പ്രശ്നം..? എന്തിനാ വിജില ആന്റി കരയുന്നെ..? ” നമിത തന്റെ അച്ഛനോട് ചോദിച്ചു.
” മോളെ.. ഐശ്വര്യയുടെ അച്ഛനൊരു ദേഹാസ്വാസ്ഥ്യം. ടൗണിലെ ഹോസ്പിറ്റലിൽ അഡ്മിറ്റ്‌ ആയിട്ടാണ് ഉള്ളത്…” സോമൻ പതിഞ്ഞ ശബ്ദത്തിൽ പറഞ്ഞു. അത് കേട്ട് ഐശ്വര്യയുടെ കണ്ണ് നിറഞ്ഞു.
” മക്കളെ നിങ്ങള് രണ്ട് പേരും വേഗം ഡ്രസ്സ്‌ മാറ് നമ്മുക്ക് ഇപ്പൊ തന്നെ ഹോസ്പിറ്റലിൽ പോകാം.. ” സോമൻ പറഞ്ഞു.
ഹോസ്പിറ്റലിൽ ICU ക്ക് പുറത്ത് വിഷമത്തോടെ ഇരിക്കുയാണ് എല്ലാവരും. ഈ സമയത്താണ് കേശവൻ മാമൻ അവിടേക്ക് വന്നത്.
” ഇന്ന് ICU ന്ന് മാറ്റുമെന്നല്ലേ താൻ വിളിച്ചപ്പോ പറഞ്ഞത്. അതാ ഞാൻ ഇപ്പൊ വന്നത്.. ” കേശവൻ പറഞ്ഞു.
” അങ്ങനെയാണ് ഡോക്ടർ ആദ്യം പറഞ്ഞത്. പക്ഷെ ഇപ്പൊ വന്നിട്ട് പറഞ്ഞു അല്പം ക്രിറ്റിക്കലാണ് അതുകൊണ്ട് ICU ന്ന് മാറ്റാൻ പറ്റില്ലെന്ന്.. ” സോമൻ വിശദീകരിച്ചു.
” സോഡിയം ലെവൽ കുറയുന്നത് വല്യ പ്രശ്നമാണ്… എന്റെ ഒരു സുഹൃത്തിനു ഇങ്ങനെ സംഭവിച്ചിട്ടുണ്ട്. വല്യ കുഴപ്പമൊന്നും കൂടാതെ റിക്കവർ ആയി..”
” പക്ഷെ രാജന്റെ കേസ്‌ കുറച്ച് മോശമാണെന്നാ ഡോക്ടർ മാരുടെ സംസാരത്തിൽ നിന്ന് എനിക്ക് മനസ്സിലായത്. അരുതാത്തതൊന്നും സംഭവിക്കാതിരുന്നാൽ മതിയാരുന്നു. “
