കഴുത്തിലെ പിടുത്തം മുറുകിയതും ശ്വാസം വലിക്കാൻ അനന്തു നന്നേ ബുദ്ധിമുട്ടി.
ആ പിടിയിൽ നിന്നും രക്ഷപ്പെടാൻ അനന്തു ശ്രമിച്ചു.
പക്ഷെ ആ നീരാളിപ്പിടുത്തത്തിൽ നിന്നും കുതറി മാറാൻ അവന് കഴിഞ്ഞില്ല.
കഴുത്തിൽ നല്ലോണം വേദനയെടുത്തു തുടങ്ങിയതും അവൻ അയാളുടെ കഴുത്തിന് പുറകിൽ പിടിച്ചു കൊണ്ട് പൊടുന്നനെ മുന്നിലേക്ക് വലിച്ചിട്ടു.
ചുമലിൽ നിന്നും ചാക്കുകെട്ട് നിലത്തേക്കിടുന്ന പോലെ അയാൾ വീണു.
ഒന്നെണീക്കുന്നതിന് മുൻപ് അനന്തുവിന്റെ വലതുകാൽ അയാളുടെ നടുവിൽ പതിഞ്ഞിരുന്നു.
“ആാാഹ് ”
നട്ടെല്ലിന് പരിക്ക് പറ്റിയ വേദനയിൽ അയാൾ കിടന്നലറി.
കലിയടങ്ങാതെ അനന്തു അയാളുടെ നടുവിന് കനത്ത പ്രഹരം നൽകിക്കൊണ്ടിരുന്നു.
നട്ടെല്ലിന് കിട്ടിയ സാരമായ താഡനം അയാളെ ക്ഷീണിതനാക്കി.
പ്രാണൻ പോകുന്ന വേദനയിൽ അയാൾ തൊണ്ട പൊട്ടുമാറ് ഉച്ചത്തിൽ അലറി.
അപ്പോഴാണ് മറുപുറത്ത് നിന്ന് നേരത്തെ അനന്തു വീഴ്ത്തിയ മറ്റൊരാൾ ഞെരുങ്ങിക്കൊണ്ട് എണീറ്റു നിന്നത്.
അയാൾ ആടിയാടി അവനു നേരെ നടന്നടുത്തു.
അയാൾ അടുത്തെത്തിയതും അനന്തു നെഞ്ച് നോക്കി മുഷ്ടി ചുരുട്ടിയിടിച്ചു.
കനത്ത ഇടി നെഞ്ചിൽ കൊണ്ട അയാൾ ബോധരനിതനായി പുറകിലേക്ക് മറിഞ്ഞു വീണു.
ഏഴ് പേരിൽ നാല് പേര് വീണു കിടക്കുന്നത് കണ്ട അവൻ ചിരിയോടെ ദക്ഷിണയെ നോക്കി.
നിസംഗതയോടെയുള്ള അവളുടെ നോട്ടത്തിന്റെ അർത്ഥം അവന് പിടി കിട്ടിയില്ല.
തെല്ലൊന്ന് ശ്രദ്ധ പാളിയതും പുറകിൽ നിന്നും തലയ്ക്കിട്ട് പ്രഹരമേറ്റതും ഒരുമിച്ചായിരുന്നു.
അനന്തു നിലത്തു കിടക്കുന്ന ബുള്ളറ്റിന്റെ മുകളിലേക്ക് മറിഞ്ഞു വീണു.
വീഴ്ചയ്ക്കിടെ ഹാൻഡിൽ ഇടുപ്പിൽ കുത്തി അവന് ശക്തമായ വേദന ഉടലെടുത്തു.
ഇടുപ്പിൽ അമർത്തി പിടിച്ചു കൊണ്ട് അവൻ എണീക്കാൻ ശ്രമിച്ചു.
പക്ഷെ കഠിനമായ വേദന അവനെ തളർത്തിക്കൊണ്ടിരുന്നു.
