ആരെയാണ് ഈ വിവരം ആദ്യം അറിയിക്കേണ്ടത്? ഭർത്താവിനേയോ അതോ വയറ്റിൽ വളരുന കുഞ്ഞിന്റെ അച്ഛനെയോ? വിനയൻ ഇതറിഞ്ഞാൽ എന്താവും ചെയ്യുക? ഈ പ്രായത്തിൽ ഒരച്ഛൻ ആകുന്നു എന്ന് കേൾക്കുമ്പോൾ !എന്തായാലും രാജേട്ടനെ അറിയിക്കാം. വിനയന്റെ കാര്യം വളെരെ ആലോചിച്ചും തന്ത്രപരമായും വേണം. പക്ഷെ തന്റെ കുഞ്ഞിന്റെ അച്ഛൻ അവനാണെന്നു അവനെ അറിയിക്കാൻ അവൾക്കുള്ളിൽ വലിയ മോഹമുണ്ട്.
വൈകുന്നേരം രാജനും അവളും ഒന്നിച്ചൊരിക്കയാണ്. രണ്ടുപേരും മൗനം . രണ്ടു പേർക്കും ഒരസ്വസ്ഥത, ഒടുവിൽ അവൾ മൗനം ഭഞ്ജിച്ചു.ടെസ്റ്റ് റിപ്പോർട്ട് രാജന് കൊടുത്തു കൊണ്ട് പറഞ്ഞു:
“പോസിറ്റീവ് ആണ്.”
രാജൻ മനസ്സിലാവാത്ത മട്ടിൽ അവളുടെ മുഖത്തേക്ക് നോക്കി.
“ഇന്നലെ ചോദിച്ചില്ലേ?ഞാനിന്നു ടെസ്റ്റ് ചെയ്തു. ഗർഭിണിയാണ്.”
രാജന്റെ മനസ്സിൽ വികാരങ്ങളുടെ ഒരു വേലിയേറ്റം.ഒന്നും പുറത്തു കാണിച്ചില്ല.അവളെ ചേർത്ത് പിടിച്ച് നെറ്റിയിൽ ചുംബിച്ചു.
“ഞാൻ ക്ലബ്ബിൽ പോയി വരാം . വരുമ്പോൾ നിനക്കെന്താ കൊണ്ടുവരേണ്ടത്? സ്പെഷ്യൽ ആയി?”
“ഒന്നും വേണ്ട. അധികം വൈകാതെ വന്നാൽ മതി”
“ആ ”
രാജന്റെ മനസ്സും സംഘർഷ ഭരിതമായിരുന്നു.തൻ നിർബന്ധിച്ചാണ് അവൾ അത് ചെയ്തത്. മറ്റൊന്നും അന്വേഷിക്കില്ല എന്ന് തൻ ഉറപ്പു കൊടുത്തതാണ്. അതുകൊണ്ട് ഒന്നും ചോദിയ്ക്കാൻ നിർവാഹമില്ല.എങ്കിലും ആരായിരിക്കും? എന്താവും അയാളോടുള്ള അവളുടെ മനോഭാവം? അവൾ തനിക്ക് നഷ്ടമായേക്കുമോ?എന്തായാലും ഇവിടെയിനി അധിക ദിവസം നിൽക്കേണ്ട. ജോയിൻ ചെയ്യാൻ ഇനിയും കുറച്ചു ദിവസങ്ങൾ കൂടിയുണ്ട്. അത്ര ദിവസം കത്ത് നിൽക്കണ്ട.ഉടൻ തന്നെ പൊയ്ക്കളയാം.
അന്നയാൾ പതിവിലും നേരത്തെ വീട്ടിലെത്തി.സാമാന്യം നന്നായി മദ്യപിച്ചിരുന്നു.കുറെ മധുരപലഹാരങ്ങളും വാങ്ങിയാണ് വന്നത്.
ഭക്ഷണം കഴിഞ്ഞ കിടക്കുമ്പോൾ അയാൾ പറഞ്ഞു:
“വിജയെ ,നമുക്ക് മറ്റന്നാൾ രാവിലെ പുറപ്പെടണം.തിങ്കളാഴ്ച അവിടെ ജോയിൻ ചെയ്യാം”
“ഇനിയും അഞ്ചാറ് ദിവസം ബാക്കിയില്ലെ ?എന്തിനാ ഇത്ര തിരക്ക് പിടിക്കുന്നത്.എനിക്ക് കുറച്ച പണികൾ തീർക്കാനുണ്ട്.”
“അതൊക്കെ നാളെത്തന്നെ തീർക്ക്.അടുത്ത ആഴ്ച എനിക്ക് ലീവ് കിട്ടില്ല.”
തുടർന്ന് അവൾ പറഞ്ഞതൊന്നും അയാൾ ശ്രദ്ധിച്ചില്ല.
“ഞായർ രാവിലെ നമ്മൾ പോകുന്നു.എന്താ ചെയ്യാനുള്ളത് ന്ന് വെച്ചാൽ എല്ലാം നാളെ ചെയ്തോ.”
അത് അവസാന വാക്കായിരുന്നു.
