അവളുടെ അച്ഛനും അമ്മാവനാരും ഞങ്ങളെ കണ്ടപാടെ വന്ന് അകത്തേക്ക് കയറാൻ ക്ഷണിച്ചു.
ഞങ്ങൾ അവളുടെ വീട്ടിനുള്ളിൽ കയറി. അവളുടെ ബന്ധുക്കൾ എന്നെ നോക്കി എന്തൊക്കെയോ പറയുന്നുണ്ട്. ഞങ്ങൾ ഞങ്ങൾക്കായി ഒരുക്കിയിരുന്ന സ്ഥലത്ത് ഇരുന്നു കുറച്ച് കഴിഞ്ഞപ്പോൾ സാരിയുടുത്ത് ഒരുങ്ങി വന്ന അനുപമയെ കണ്ടപ്പോൾ എന്റെ ഉള്ളിലെ സങ്കടം മാറി.
പിന്നെ എല്ലാം പെട്ടെന്നായിരുന്നു. ജാതകം അങ്ങോട്ടും ഇങ്ങോട്ടും കൈമാറി അതിനു ശേഷം അങ്ങോട്ടും ഇങ്ങോട്ടും മോതിരം മാറി.
ഭക്ഷണം കഴിച്ച് ഞാനും അനുവും മാറിനിന്ന് സംസാരിക്കുമ്പോഴാണ് ഒരാൾ ഞങ്ങളുടെ അടുത്ത് വന്നത്. മുൻപ് ഞാൻ കണ്ടിട്ടില്ലെങ്കിലും ആൾ ആരാണെന്ന് കണ്ടപ്പോൾ തന്നെ മനസ്സിലായി അനുപമയുടെ അനിയൻ അനൂപ്. രണ്ടുപേരുടെയും മുഖം ഏകദേശം ഒരുപോലെയാണ്.
അവൻ വന്ന് എന്നെ കെട്ടിപിടിച്ചു.
“സോറി അളിയാ ഇവൾ പറഞ്ഞതു കൊണ്ടാണ് രാവിലെ ഞാൻ അങ്ങനെ ഫോണിൽ സംസാരിച്ചത് ” അവൻ അതും പറഞ്ഞ് ഒന്ന് പുഞ്ചിരിച്ചു.
“നീ എന്താ എന്നോട് പറയാതിരുന്നത് ” ഞാൻ അവളോട് ചോദിച്ചു.
“എല്ലാം ചേട്ടന്റെ അച്ഛന്റെ പ്ലാനിങ്ങാ എനിക്ക് അനുസരിക്കാതിരിക്കാൻ പറ്റീല ” അവൾ ഒരു വിഷമത്തോടെയാണ് അത് പറഞ്ഞത്.
എനിക്ക് ചിരിയാണ് വന്നത്.
അങ്ങനെ വിവാഹവും നിശ്ചയിച്ചു .രണ്ട് മാസം സമയമുണ്ട്.
പിന്നീടുള്ള ദിവസങ്ങൾ പെട്ടെന്ന് പോയി പ്രണയിച്ചു തീർത്തു എന്ന് പറയുന്നതാകും ശരി.
അങ്ങനെ ആ ദിവസം വന്നു അഗ്നിസാക്ഷിയാക്കി അവളുടെ കഴുത്തിൽ താലി കെട്ടിയപ്പോൾ എന്റെ ജീവിതത്തിലെ ഏറ്റുവും നല്ല നിമിഷമായി ആ ദിവസം മാറി.
ഫങ്ഷനൊക്കെ കഴിഞ്ഞ് വീട്ടിൽ തിരിച്ച് എത്തിയപ്പോൾ ഞാനും അനുപമയും ഒരുപോലെ ക്ഷീണിച്ചിരുന്നു സമയവും നന്നേ വൈകിയിരുന്നു. അമ്മ അവളെ മറ്റൊരു റൂമിലേക്ക് കൊണ്ടുപോയി. ഞാൻ എന്റെ റൂമിൽ വന്ന് ഫ്രഷായി ഡ്രസ് മാറി കട്ടിലിലിരുന്നു. മൊബൈലിൽ ചില കൺഗ്രാറ്റ്സ് ഒക്കെ വന്ന് കിടപ്പുണ്ട്. ഞാൻ ഫോൺ മാറ്റിവച്ച് ചുവരിൽ ചാരി ഇരുന്നു.
കതക് തുറക്കുന്ന ശബ്ദമാണ് എന്നെ ഉണർത്തിയത്. നോക്കിയപ്പോൾ ഒരു പുതിയ സാരിയിൽ കയ്യിൽ പാൽ ഗ്ലാസ്സുമായി നിൽക്കുന്ന അനുപമയെയാണ് ഞാൻ കണ്ടത് .അവൾ ഡോറടച്ച് എന്റെ അടുത്ത് വന്ന് പാൽ ഗ്ലാസ്സ് എന്റെ നേരെ നീട്ടി. ഞാൻ പകുതി കുടിച്ച് ബാക്കി അവൾക്കു നേരെ നീട്ടി. അവൾ അത് വാങ്ങി ബാക്കി കുടിച്ച് എന്റെ അടുത്തിരുന്നു.
