അമ്മ ഒരു തമാശ എന്ന രൂപേണ ഒരു താക്കിത് ആണ് തന്നത്. അവളുടെ അച്ഛൻ വരുന്നത് വരെ ഇനി ഒന്നും നടക്കില്ലേ ആവോ?
” ഞാൻ ഒന്നും ചെയ്തില്ല… ഈ നന്ദുവേട്ടനാ….. ”
ദേവു കുസൃതിയോടെ എന്റെ നേരെ വിരൽ ചൂണ്ടി.
” അവനെ നീ നോക്കണ്ടാ മോളെ…. പണ്ടേ വിവരം ഇല്ലാത്തവനാ…നിന്നേ. നീ തന്നെ നോക്കിയാൽ മതി….. ”
കിട്ടിയ അവസരം ഏടത്തിയും മുതലെടുത്തു.
” നന്ദുട്ടാ.. അമ്മ പറഞ്ഞത് ഓർമയുണ്ടല്ലോ…. അല്ലെ …? ” അമ്മയുടെ ഓർമ്മപ്പെടുത്തൽ വീണ്ടും എന്നെ പൊള്ളിച്ചു. എന്ത് മറുപടി പറയണം എന്നറിയാതെ ഞാൻ കുഴങ്ങി. ദേവുവിന് നേരെ കണ്ണോടിക്കുമ്പോൾ അമ്മയുടെ മടിയിൽ കിടക്കുന്ന എന്നെ കൗതുകത്തോടെ നോക്കുകയാണവൾ… അമ്മയുടെയും ഏടത്തിയുടേം സ്നേഹം ഏറ്റുവാങ്ങി അവരുടെ നടുക്കായി ഇരുന്നു എന്റെ പെണ്ണിന്റെ കണ്ണുകൾ നിറഞ്ഞിരുന്നോ.. അറിയില്ല. അത്രക്ക് സന്തോഷവതി ആണിന്നെന്റെ ദേവൂട്ടി….. ഈ കാഴ്ച കൺകുളിർക്കെ നോക്കി കണ്ടു അതൊരു മായാത്ത ചിത്രമായി മനസ്സിൽ പതിപ്പിച്ചിരുന്നു ഞാൻ …
ഈ ഒരു നിമിഷത്തിനു വേണ്ടി ആണ് ഞാൻ കത്ത് നിന്നത്. ഈ ഒരു നിമിഷം ആണ് ഞാൻ സ്വപനം കണ്ടത്. എന്റെ ദേവുവിനെ എനിക്ക് തന്നെ എന്ന് അവർ തീരുമാനിച്ചിരിക്കുന്നു…
പണ്ടെങ്ങോ ഞാൻ മൂലം നഷ്പ്പെട്ട സന്തോഷം തിരികെ വന്നിരിക്കുന്നു.. ആ സന്തോഷം പങ്കിടാൻ ഇനി എന്റെ ദേവൂട്ടി കൂടി….. ഈ വീട്ടിൽ…. അമ്മയുടെ മകൾ ആയി. ഏട്ടന്റെയും ഏടത്തിയുടെ കുഞ്ഞനുജത്തിയായി…. എന്റെ എല്ലാം എല്ലാം ആയി ………..
എങ്കിലും എന്നെ കുഴപ്പിച്ചത് അമ്മയുടെ ആ തീരുമാനം തന്നെ ആയിരുന്നു. ഒരു മടങ്ങി വരവില്ലാത്ത യാത്രയിലാണ് അച്ഛനെന്നു അമ്മയോടും എല്ലാവരോടും ഉറക്കെ വിളിച്ചു പറയണം എന്നുണ്ട്. പക്ഷെ എനിക്കാവില്ല ഒന്നും ആരെയും അറിയിക്കാൻ…..
ചിന്തയിലിടക്ക് കണ്ണ് പാഞ്ഞത് ദേവുവിലേക്കാണ്. അമ്മയുടെ അരികിൽ ഇരിക്കുന്ന ദേവുവിൽ അല്പം കുസൃതിയും അതിലേറെ സന്തോഷവും നിറഞ്ഞു നിന്നു. അതെ കുസൃതിയോടെ അവളെന്നേയും നോക്കി. പുഞ്ചിരിച്ചു..എന്താണ് എന്ന് എന്നോട് കണ്ണുകൾ കൊണ്ട് ആംഗ്യം കാട്ടി..
ഒന്നുമില്ലെന്ന് പറയാനാണ് തോന്നിയതെങ്കിലും ആരും കാണാതെ ഒരു കണ്ണടച്ചൊന്നു ചിരിച്ചു ഉമ്മ കൊടുക്കുന്നത് പോലെ ആംഗ്യം കാട്ടാനാണ് എനിക്ക് കഴിഞ്ഞത്…
” നന്ദുട്ട……. ”
എല്ലാം കണ്ടുകൊണ്ടിരുന്ന അമ്മയുടെ താക്കിത് വീണ്ടുമെത്തി. പിന്നെ ഞാൻ ഒന്നിനും പോയില്ല..
