🔥ഏദൻ തോട്ടത്തിന്റെ കാവൽക്കാരൻ 14🔥

റസാക്കിനെ കുറിച്ച് കൂടുതൽ കേൾക്കാനായി അവരിലേക്ക് ഒന്ന് കൂടി പറ്റിച്ചേർന്നു … 

 

” ഷമീമിക്ക ആലോചനയുമായി വന്നു കണ്ടിട്ട് പോയ ദിവസം ,പകൽ മൊത്തം എനിക്ക് മുഖം തരാതെ നടന്ന റസാക്ക് രാത്രി വൈകി എന്റെയരികിലേക്ക് വന്നു , ഞാനാണെങ്കിൽ ഷമീമിക്ക വന്നു കണ്ടതിന്റെ ആ ഒരു …എന്താ പറയുക ..ഒരാണ് എന്നെ വന്നു കണ്ടിട്ട് ഇഷ്ട്ടപ്പെട്ടു പോയ ദിവസമല്ലേ ,അതിന്റെയൊരു ചിന്തയിൽ കിടക്കുകയാണ് …അപ്പോഴാണ് അവൻ അടുത്ത് വന്നു കിടക്കുന്നതു ,എന്തോ അന്ന് ദിവാസ്വപ്നത്തിൽ മുഴുകി കിടന്നതു കൊണ്ടാകും അടുത്ത് വന്നു കിടന്നതൊന്നും ഞാൻ അറിഞ്ഞില്ല ,,എന്തോ നനവ് കയ്യിൽ പറ്റിയപ്പോഴാണ് ഞാൻ അറിയുന്നത് തന്നെ ,കണ്ണ് തുറന്നു നോക്കുമ്പോൾ …… ആദ്യമായിട്ടാണ് എന്റെ കുട്ടിയെ ഞാൻ ആ കോലത്തിൽ കാണുന്നത് ,ആകെ കരഞ്ഞു കണ്ണൊക്കെ കലങ്ങി ….എന്താടാ പറ്റിയെ എന്ന് ചോദിച്ചതേയുള്ളു എന്നെ വിട്ടു പോകുവാണോ എന്ന് ചോദിച്ചു കെട്ടിപ്പിടിച്ചൊരു കരച്ചിലാ ..അവൻ കരയുന്നതു കണ്ടപ്പോൾ എനിക്കും സങ്കടം വന്നു ,എങ്കിലുമത് പുറത്തു കാണിക്കാതെ അവനെ ആശ്വസിപ്പിക്കാൻ നോക്കി ………….. എവിടെ അവൻ കരച്ചിൽ നിർത്തേണ്ടേ ..,,എന്തൊക്കെയോ പറഞ്ഞു ഒരു വിധത്തിൽ അടക്കിക്കിടത്തിയപ്പോൾ അവൻ എന്നോട് ചോദിച്ചു ഇത്തയെ ഞാൻ നിക്കാഹ് ചെയ്യട്ടെ എന്ന്,, എങ്കി എനിക്ക് ഇത്തയെ ഇപ്പോഴും കൂടെ കിട്ടുമല്ലോ എന്ന് ,ചെക്കന്റെ അന്നേരത്തെ ഒരു വിവരക്കേടായെ ഞാനതിനെ കണ്ടുള്ളു , നമ്മള് ആങ്ങളയും പെങ്ങളുമാണ് അങ്ങനെയൊന്നും ചിന്തിക്കരുത് ,പടച്ചോൻ പൊറുക്കൂല എന്നൊക്കെ പറഞ്ഞു ഞാൻ അവനെ കുറെ ഉപദേശിച്ചു …എങ്ങനെയെങ്കിലും അവനെ പറഞ്ഞു വിട്ടു ഷമീമിക്കയെ കുറിച്ചുള്ള സ്വപ്നങ്ങളിലേക്ക് പോകാനുള്ള തിടുക്കം കൂടി ഉള്ളിലുള്ളത് കൊണ്ട് അവൻ പറയുന്നതൊന്നും കേൾക്കാൻ നിൽക്കാതെ അവസാനം ഉന്തിത്തള്ളി എഴുന്നേൽപ്പിച്ചു വിട്ടു ..പിറ്റേന്നു രാവിലെ ചായയുമായി ചെല്ലുമ്പോൾ മുറിയിൽ അവനില്ല , കുറെ നോക്കി നടന്നു അവസാനം ഉമ്മയോട് ചോദിച്ചപ്പോൾ വെളുപ്പിനെ എളാപ്പയുടെ വീട്ടിലേക്ക് പോയെന്നു പറഞ്ഞു, തമാശ കേൾക്കണോ അനക്ക് ,വെളുപ്പാൻ കാലത്തു വന്നു വിളിച്ചെഴുന്നേൽപ്പിച്ചു ഓൻ ചോദിക്കുവാ ഇത്തയെ എനിക്ക് കെട്ടിച്ചു തരുവോന്നു ,പൊയ്ക്കോണം എന്ന് പറഞ്ഞു ഞാൻ കയ്യോങ്ങി ഓടിച്ചു ,കുറച്ചു കഴിഞ്ഞു വേഷം മാറി വന്നു എളാപ്പയുടെ വീട്ടിൽ പോകുവാന്നു പറഞ്ഞു ഒറ്റപ്പോക്കാ ,ജനിച്ചപ്പോ തൊട്ടു അന്റെ കൂടെ പറ്റിക്കൂടി നടന്നതല്ലേ ചെക്കൻ , നിക്കാഹ് എന്നൊക്കെ കേട്ടപ്പോൾ ഓനാകെ പേടിച്ചു പോയി കാണും ,ആ ഒരിത് മാറാൻ കുറച്ചൂസം മാറിനിൽക്കെട്ടെടി ..ആലോചിച്ചപ്പോൾ അത് നല്ലതാണെന്ന് എനിക്കും തോന്നി ,………..പക്ഷെ ഒരു ദിവസം, രണ്ടു ദിവസം.. ദിവസങ്ങൾ അങ്ങനെ കടന്നു പോകുംതോറും അവനെ കാണാതെ എനിക്ക് പിടിച്ചു നിൽക്കാൻ പറ്റാതായി,ജീവന്റെ ഭാഗമായി കൊണ്ട് നടന്നതില്ലേ അവനെ , കാര്യങ്ങളൊക്കെ മയത്തിൽ പറഞ്ഞു അവന്റെ വിഷമങ്ങൾ മാറ്റിയെടുക്കാൻ നിൽക്കാതെ ഒഴിവാക്കി ഉന്തിത്തള്ളി വിട്ടതിൽ ഉള്ളിൽ കുറ്റബോധം തോന്നി ,ഒടുവിൽ ഞാൻ ആരോടും പറയാതെ ബസു കയറി എളാപ്പയുടെ വീട്ടിലേക്ക് വിട്ടു ..രണ്ടാളും സർക്കാർ ജോലിക്കാരായതു കൊണ്ട് ഞാൻ ചെല്ലുമ്പോൾ ഇവൻ മാത്രമേയുള്ളു വീട്ടിൽ .. കാര്യം നല്ല വാക്ക് പറഞ്ഞു സമാധാനിപ്പിച്ചു കൂട്ടിക്കൊണ്ടു വരാൻ പോയതാണെങ്കിലും അവനെ കണ്ടതും സങ്കടവും ദേഷ്യവും ഒക്കെ കൂടി എന്റെ നിയന്ത്രണം പോയി ഇത്തയോട് പറയാണ്ട് പോകുമോടാ എന്നൊക്കെ കയ്യിൽ കിട്ടിയൊരു ചെറിയ വടി വച്ച് ചോദിച്ചു കുറെ അടിച്ചു , ആദ്യമായിട്ടാണ് ഞാനവനെ …..ഒന്നും മിണ്ടാതെ എന്റെ റസാക്ക് ആ അടിയെല്ലാം കൊണ്ട് എന്നെ തന്നെ നോക്കി നിന്ന് ,വേണമെങ്കിൽ കൊന്നോ എന്ന ഭാവത്തിൽ , അതോടെ എന്താ പറയുക വടി ദൂരെയെറിഞ്ഞു ഞാനവനെ കെട്ടിപ്പിടിച്ചു കരഞ്ഞു ,ഞാൻ കരയാൻ തുടങ്ങിയതോടെ അവനും കണ്ണ് നിറഞ്ഞു ,,,പിന്നെ രണ്ടാളും കൂടി കരച്ചിലും പിഴിച്ചിലും ഒന്നും പറയേണ്ടാ ……. ഒടുക്കം മനസ്സൊക്കെ ഒന്ന് തണുത്തപ്പോൾ ഞാൻ അവനോടു റെഡിയാകാൻ പറഞ്ഞു…”

 

 

ഇത്തയൊന്നു നിർത്തി , ആ രംഗം അവർക്ക് മുന്നിൽ തെളിഞ്ഞു നിൽക്കുന്ന പോലെ തോന്നി മുഖത്തെ ഭാവം കണ്ടപ്പോൾ ..

 

 

 

”എന്നെ വേണ്ടാത്തവരുടെ അടുത്തേക്ക് ഞാനെന്തിനാ.. അതിനു ആർക്കാ നിന്നെ വേണ്ടതെന്നു ഞാൻ തിരിച്ചു ചോദിച്ചു,, ഇത്തയ്ക്ക് തന്നെ, അല്ലെങ്കിൽ എന്റെ ഇഷ്ട്ടം കാണാതെ വേറെ ആളെ നിക്കാഹ് പോകാൻ നിക്കില്ലലോ,, ഞാൻ നിന്റെ ഇത്തയാണ് ,തമാശയാണെങ്കിലും അങ്ങനെയൊക്കെ പറഞ്ഞാൽ പടച്ചോൻ പൊറുക്കില്ല എന്നൊക്കെ പറഞ്ഞിട്ടും ഓൻ പിടിച്ച പിടി തന്നെ.. അവസാനം ഷമീമിക്കയുമായുള്ള നിക്കാഹ് എന്തെങ്കിലും കാരണം പറഞ്ഞു ഒഴിവാക്കി വിടാം എന്ന് ഉറപ്പു കൊടുത്തുത്തതോടെ അയാളൊന്നു അയഞ്ഞു ,വീട്ടിലേക്ക് തിരിച്ചു വരാൻ തയ്യാറായി …”