അടുത്ത ദിവസം പതിവ് പോലെ മോനെ ഭാര്യയുടെ വീട്ടിൽ കൊണ്ടെയാക്കി ഞാനും ഭാര്യയും ഒന്നിച്ച് ഓഫീസിലേക്ക് പോയി.ഓഫീസിലെത്തി കുറച്ച് കഴിഞ്ഞപ്പോൾ ബെന്നിച്ചേട്ടൻ വന്നു.അന്ന് ഞങ്ങൾക്ക് കുണ്ടന്നൂരിലെ ഒരു ഫൈവ് സ്റ്റാർ ഹോട്ടലിൽ ആക്സസ് കൺട്രോൾ ഫിറ്റ് ചെയ്തു കൊണ്ടിരിക്കുന്നതിൻ്റെ മേൽനോട്ടത്തിനായി പോകേണ്ടി വന്നു. വലിയ സൈറ്റുകളിൽ ഞാനും ,ബെന്നിച്ചേട്ടനും മേൽനോട്ടത്തിന് പോകാറുണ്ട്. കമ്പനിയുടെ ഉയർന്ന ആളുകൾ കൂടെക്കൂടെ പണി നോക്കാൻ വരുന്നു എന്നത് അവരുടെ അടുത്ത പ്രൊജക്റ്റിൽ ഞങ്ങളെ പരിഗണിക്കുന്നതിനുള്ള ഒരു പ്രധാന കാരണമാണ്.മിക്ക കമ്പനികളും കുറേ പണിക്കാരെ അഴിച്ച് വിടും, അവർക്ക് തോന്നുന്ന പടിയൊക്കെ വർക്ക് സൈറ്റിൽ കാട്ടിക്കൂട്ടും. അവർ എന്താണ് കാണിക്കുന്നതെന്ന് സൈറ്റിലുള്ള മുതലാളിയുടെ സൂപ്പർവൈസർമാർക്ക് പിടി കിട്ടുകയുമില്ല. അവസാനം എല്ലാം കൊളമായി തല്ലിക്കൂട്ടി ഒപ്പിക്കും. ഒന്നും മരിയാദക്ക് വർക്ക് ചെയ്യുകയുമില്ല.

ഇടക്ക് ഞങ്ങൾ ചായ കുടിക്കാനിറങ്ങി.

ബെന്നിച്ചേട്ടൻ ചോദിച്ചു.

എടാ നീ നിഷയോട് കാര്യം അവതരിപ്പിച്ചോ?

ഇല്ല ബെന്നിച്ചേട്ടാ അവളുടെ നല്ല മൂഡ് നോക്കി വേണം പറയാൻ

ഇല്ലെങ്കിൽ പണിയും കളഞ്ഞ്, എന്നെ ഡൈവോഴ്സും ചെയ്തവൾ പോകും.. അവളുടെ കമാൻഡിങ് പവർ ചേട്ടൻ കാണുന്നതല്ലേ.

എടാ നീ പറഞ്ഞത് ശരിയാണ്

കമ്പനിയും ഓഫീസും അവൾ വന്നതിൽ പിന്നെ എണ്ണയിട്ട യന്ത്രം പോലെയായി. ആകെ കുത്തഴിഞ്ഞ് കിടക്കുവല്ലായിരുന്നോ. കുറേ സാധനമുണ്ടാക്കും കുറേ വിൽക്കും, കുറേ പണികൾ അവിടവിടെ ചെയ്യും കുറേ കാശ് കമ്പനി അക്കൗണ്ടിൽ വരും..

എന്നാൽ വരവ് എത്ര? ചിലവെത്ര എന്ന് ചോദിച്ചാൽ ആർക്കും ഉത്തരമില്ല. വർഷാവസാനം ഓഡിറ്റർ പറയും ഇത്ര വരവ്, ഇത്ര ചിലവ് അതാണ് മുതലാളി നോക്കിയിരുന്നത്.

പക്ഷേ ഇപ്പോൾ നിഷയുടെ കണ്ണ് വെട്ടിച്ച് ഒരു പണിയും നടക്കുന്നില്ല.

എല്ലാം അവൾ ഒരു ഓർഡറാക്കി.