: പിണങ്ങല്ലേ… ഏട്ടനോട് പറ.. ആരാ കക്ഷി…അമ്മായിയും അന്നേ എന്നോട് പറഞ്ഞിരുന്നു നിന്നെയൊന്ന് സൂക്ഷിക്കാൻ… നിന്റെ ഫോണിൽ എന്തോ ഫോട്ടോ കണ്ടെന്നോ.. നീ ആരോടോ ഫോണിൽ സംസാരിക്കുന്നത് കേട്ടെന്നോ ഒക്കെ…
: അതൊന്നുമില്ല… ഏട്ടന് ചുമ്മാ തോന്നിയതാ.. എന്റെ ഉള്ളിൽ ഒന്നുമില്ല
: എന്ന എന്റെ ഉള്ളിലുള്ള ഒരു കാര്യം ഞാൻ പറയട്ടെ…. ഇനിയും വൈകിയാൽ ശരിയാവില്ല. എന്റെ മോൾക്കും പ്രായം കൂടി വരുവല്ലേ
: എന്താ ഏട്ടാ… പറ പറ…
: അയ്യട.. നിന്നോടല്ല.. ഞാൻ എന്റെയുള്ളിലുള്ളത് ഒരാളോട് തുറന്നു പറയുന്ന കാര്യമാ പറഞ്ഞത്.. അത് ശരിയായാൽ നിന്നോട് പറയാം.. അല്ലേൽ ചിലപ്പോ നീ പോയി വിരട്ടി കാര്യം സാധിപ്പിക്കും… യൂണിഫോമിട്ടാൽ നീ തനി പോലീസുകാരിയാ
: ഓഹ്… വലിയ ഡിമാന്റുള്ള ഒരാള്.. എന്ന പോയി പറഞ്ഞിട്ട് വാ.. അപ്പൊ ഞാനും ഒരു കാര്യം പറയാം ട്ടോ…ഇനി എന്റെ മോൻ പുട്ടുണ്ടാക്ക്.. ഞാൻ പോയി റെഡിയായി വരാം
: അല്ലേൽ എന്നും നീയാണല്ലോ ഇവിടത്തെ പണിയൊക്കെ ചെയ്യുന്നത്…
കഴിച്ചുകഴിഞ്ഞ് രണ്ടുപേരും ഒരുമിച്ച് വീട്ടിൽ നിന്നും ഇറങ്ങി. ഹരി ഓഫീസിലേക്ക് പോകുന്ന വഴിക്കാണ് സ്വപ്നയുടെ വീടെന്ന് ഇപ്പോഴാണ് ഹരി അറിയുന്നത്. റോഡരികിൽ ചുവന്ന പരവതാനി വിരിച്ചുകൊണ്ട് വീണുകിടക്കുന്ന വാക പൂക്കളാൽ സമൃദ്ധമായ ചുറ്റുപാടിൽ ബസ് കാത്തുനിൽക്കുന്ന സ്വാപ്നയെ കണ്ടതും ഹരിയുടെ മുഖം പ്രസന്നമായി. മുന്നിൽ വന്നു നിർത്തിയ കാറിന്റെ വിൻഡോ ഗ്ലാസ് താഴ്ന്നപ്പോഴാണ് സ്വപ്നയ്ക്ക് ആളെ മനസിലായത്. പെട്ടെന്ന് ഹരിയെ കണ്ട സ്വപ്നയ്ക്ക് ആകെ ഒരു വെപ്രാളമായിരുന്നു. അതിനിടയിൽ അവൾ എന്തൊക്കെയോ പറഞ്ഞൊപ്പിച്ചു.. അൽപ്പം മടിയോടെ ആണെങ്കിലും സ്വപ്ന ഹരിയുടെ ആവശ്യപ്രകാരം കാറിൽ കയറി.. സ്വപ്നയുടെ സാനിധ്യം ഹരിയെ വല്ലാതെ ഉന്മത്തനാക്കി.
: ഇവിടാണോ സ്വപ്നയുടെ വീട്…
: കുറച്ച് പുറകിൽ ആണ്…. ഒരു പത്തുമിനിറ്റ് നടക്കണം
: എന്നിട്ട് ഞാൻ ഇതുവരെ കണ്ടില്ലല്ലോ ഇവിടെ നിൽക്കുന്നത്..
: ഇന്ന് ഞാൻ അൽപ്പം വൈകി… അല്ലെങ്കിൽ ഈ സമയത്ത് ഓഫീസിൽ എത്തിയിട്ടുണ്ടാവും
: അത് നന്നായി… അതെന്താ ഞാൻ വിളിച്ചപ്പോൾ സ്വപ്നയൊന്ന് കാറിൽ കയറാൻ മടിച്ചത്
