റോസാപ്പൂക്കൾ കൊണ്ട് ഭംഗിയായി അലങ്കരിച്ച ഒരു ചുവന്ന നിറമുള്ള സ്വിഫ്റ്റ് കാർ സജീഷിന്റെ വീടിന്റെ മുൻപിൽ വന്ന് നിന്നു…
രേഷ്മ കാറിൽ നിന്ന് പുറത്തേക്ക് ഇറങ്ങി…
ഒപ്പം അവനും…
കരഞ്ഞു കലങ്ങിയ കണ്ണുകൾ പറ്റാവുന്ന പോലെ എല്ലാം മോഡി പിടിപ്പിക്കാൻ കാറിൽ ഇരുന്ന് തന്നെ അവൾ ശ്രമിച്ചിരുന്നു…
ഇപ്പോൾ സങ്കടവും വിഷമവും എല്ലാം മനസ്സിൽ മാത്രമാണ്… മുഖത്ത് ഒരു ചിരി വച്ചു പിടിപ്പിക്കാനും അവൾ മറന്നില്ല…
ഉള്ള് പൊള്ളുന്നത് അവർ അറിയണ്ടല്ലോ…
ആളുകളെ കാണിക്കാൻ വേണ്ടി മാത്രം ഒരു പ്രഹസനം…
ബന്ധുക്കളുടെയും അയൽക്കാരുടെയും ഒരു വലിയ നിര തന്നെ വീടിന്റെ മുൻപിൽ സ്ഥാനം പിടിച്ചിട്ടുണ്ട്.
വലിയ തിരക്ക്.
ഇരുപക്ഷെ ഇവിടം ഒരു ഗ്രാമപ്രദേശം ആയതുകൊണ്ടാവാം അവൾ ചിന്തിച്ചു…
ആ ജനസഞ്ചയത്തിന്റെ നടുവിലൂടെ സജീഷിന്റെ കയ്യിൽ കൈ കോർത്ത് പിടിച്ച് അവൾ വീടിന്റെ ഉമ്മറത്തേക്ക് നടന്നു…
ഒരു ഭവനത്തിലേക്ക് സർവ്വഐശ്വര്യവും പകർന്നു നൽകാൻ വരുന്ന ദേവിയെ പോലെ, അവളെ കാണാൻ ആ മനോഹര നിമിഷത്തിന് സാക്ഷിയാവാൻ ആളുകൾ തിങ്ങിക്കൂടി…
തീരെ വയ്യാതായെങ്കിലും അഞ്ചു തിരിയിട്ട ഒരു നിലവിളക്കുമായി സജീഷിന്റെ അമ്മ വീടിന്റെ മുൻപിൽ തന്നെ നിൽപ്പുണ്ടായിരുന്നു… തന്റെ മരുമകളെ വീട്ടിലേക്ക് ആനയിക്കാൻ…
അടുത്ത് കൂടി നിൽക്കുന്ന സ്ത്രീ ജനങ്ങൾ രേഷ്മയെ നോക്കി ചിരിക്കുകയും കളി പറയുകയും ചെയ്യുന്നുണ്ട്…
അതോന്നും തെല്ലും വകവക്കാതെ അവൾ അമ്മയുടെ കയ്യിൽ നിന്ന് നിലവിളക്ക് വാങ്ങി…
കത്തുന്ന നിലവിളക്കിന്റെ പ്രകാശത്തിൽ അവളുടെ വർണ്ണ ദീപ്തമായ മുഖം കൂടുതൽ തിളങ്ങി നിന്നു…
” ഒന്ന് പ്രാർത്ഥിച്ചോളൂ മോളെ ”
അമ്മയുടെ വാക്കുകൾ…
അവൾ ഒന്ന് കണ്ണടച്ചു തൊഴുതു…
പിന്നീട് ആ വീടിന്റെ പടികൾ ഓരോന്നായി കയറി
അങ്ങനെ സജീഷിന്റെ ജീവിതത്തിലേക്ക് അവന്റെ സഖിയായി വലതുകാൽ വച്ച് അവൾ കടന്നു വന്നു…
മുൻപിൽ നടക്കുന്ന തന്റെ പ്രിയ പത്നിയുടെ പുറകെ
അമ്മയെയും ചേർത്ത് പിടിച്ച് അവനും വീടിന്റെ അകത്തേക്ക് നടന്നു…
ഒരു ശുഭാന്ത്യം…
വിവാഹത്തിന്റെ ആദ്യ വട്ട ചടങ്ങുകൾ തീർന്നപ്പോൾ തന്നെ ഒരു വിധം ആളുകൾ അവിടെ നിന്ന് ഒഴിഞ്ഞു പോയി…
പിന്നീട് മദ്യക്കുപ്പികളിൽ മതി മറക്കാനും മദലാസകളെ മനം മടുക്കുവോളം കാണാനും വെമ്പുന്ന ചിലർ മാത്രമായി അവിടെ…
സൂര്യൻ 90 ഡിഗ്രിയിൽ നിന്ന് പടിഞ്ഞാറോട്ട് തെല്ല് മാറിയപ്പോഴേക്കും ചെറുക്കന്റെ വീട്ടിലെ പരിപാടിക്കായി വീണ്ടും ആളുകൾ എത്തി തുടങ്ങി… പുതിയ ഒരു ഡ്രെസ്സ് അണിഞ്ഞുകൊണ്ട് നവദമ്പതികൾ പന്തലിലേക്ക് വീണ്ടും കടന്നു വന്നു…
കൂടി നിന്നവർ കയ്യടികളോടെ അവരെ സ്വീകരിച്ചു….
ബന്ധുക്കൾ അധികം ഇല്ലെങ്കിലും നാട്ടിലെ ഒട്ടുമിക്ക ആളുകളും സജീഷിന്റെ വിവാഹ വിരുന്നിൽ പങ്കെടുത്തിരുന്നു…