നോക്കൂ! അവളാ പതക്കത്തിലൊന്നമർത്തി. രണ്ടായി പൊളിഞ്ഞ പാതിയിൽ കൊത്തിയ പേരവനെക്കാട്ടി. ശ്യാം!
ശ്യാം രണ്ടാമത് വരാണസിയിൽ നിന്നു വന്നപ്പോൾ രണ്ടേലസ്സുകൾ കൊണ്ടുവന്നിരുന്നു. അവിടെയേതോ അമ്പലത്തിൽ പൂജിച്ചതാണ്. നീ കണ്ടുകാണുമല്ലോ… ഒന്നിലെൻ്റെ പേരും മറ്റതില്…. അവളുടെ സ്വരം നേർത്തു…
ഞാൻ ശ്യാമ…. അവനെന്തോ പറയാനാഞ്ഞു. അവളവൻ്റെ വായ പൊത്തി. നീ സത്യത്തിനു നേരേ കണ്ണടയ്ക്കരുത്. നിനക്ക് ഞാൻ പറയണതു കേൾക്കണ്ടേടാ?
അവൻ്റെ നാവിറങ്ങി. തലയാട്ടി സമ്മതമറിയിച്ചു.
അന്നു രാവിലെ എൻ്റെ മുലകൾ പൊള്ളുന്നതറിഞ്ഞാണ് ഞാനെണീറ്റത്. ഈ ഏലസ്സിൻ്റെ ചൂടായിരുന്നു…ഹൃദയം ശക്തമായി ഇടിച്ചു… എൻ്റെ ജീവന്… നിനക്ക്… എന്തോ പറ്റിയെന്ന തോന്നൽ… അവൾ മുന്നോട്ടാഞ്ഞ് അവനെ ആർത്തിയോടെ ഉമ്മവെച്ചു. എബിയ്ക്കു തല കറങ്ങുന്നപോലെ തോന്നി. പിന്നെയും കശുമാവിൻ തോട്ടത്തിന്റെ ഗന്ധം…. കിളുന്തു പെണ്ണിൻ്റെ മധുരം…അവൻ ഒന്നു തലകുടഞ്ഞു..
പിന്നെയെനിക്കറിഞ്ഞൂടാ… എന്തൊക്കെയോ വലിച്ചുവാരിയുടുത്ത് ഒറ്റയോട്ടമായിരുന്നു. ഏതൊക്കെയോ വഴികളിലൂടെ… ഒരു ഭ്രാന്തിയെപ്പോലെ.. പരിസരബോധമൊന്നും ഇല്ലായിരുന്നു. പിന്നെ അലഞ്ഞുതിരിഞ്ഞ് വഴിതെറ്റിയിട്ടും ഒരു മൃഗത്തിൻ്റെ ദിശാബോധം.. എന്നെയാ പഴയ കശുമാവിൻതോട്ടത്തിൽ കൊണ്ടു ചെന്നുചേർത്തു..
അവളൊന്നു നിർത്തി. മിഴികൾ ദൂരെയെവിടെയോ…
നിനക്കാ തോട്ടം നേരത്തേ അറിയാമായിരുന്നോ? ആ ഇടവേളയിൽ എബി ചോദിച്ചു.
ഉം… അവൾ തലയാട്ടി… പണ്ട്… അവസാനം ഞാനവിടെ..അവളുടെ കണ്ണുകൾ നനഞ്ഞു..
എന്നിട്ട്? അവളുടെ മൂഡു മാറ്റാൻ എബി ആ കൈകളുയർത്തി കൈവെള്ളകളിൽ മൃദുവായി ഉമ്മവെച്ചു.
എൻ്റെ മുന്നാ… അവളുടെ സ്വരത്തിൽ ഏതോ വികാരങ്ങളലയടിച്ചു. അന്നെനിക്ക് പതിനെട്ട് പത്തൊമ്പത് വയസ്സാണ്… അന്ന്… ആ മുഖത്തൊരു പുഞ്ചിരി വിടർന്നു… പതിയെ അവളുടെ മുഖമിരുണ്ടു…
എന്നിട്ട്? ഇന്നെന്തുണ്ടായി? എബി അവളെ തിരിച്ചു കൊണ്ടുവരാൻ ശ്രമിച്ചു.
അവിടെ.. ആ കശുമാവുകളുടെ തണലിലൂടെ നടന്നപ്പോൾ എനിക്കറിയാമായിരുന്നു.. നീ അവിടെയുണ്ടെന്ന്… നിൻ്റെ മണം! അവൾ മുന്നോട്ടാഞ്ഞ് അവൻ്റെ കഴുത്തിൻ്റെ വശത്ത് മുഖമമർത്തി ശ്വാസം ആഞ്ഞുവലിച്ചു.. ഈ മണം! ഞാനൊരു വേട്ടപ്പട്ടിയെപ്പോലെ അതു പിന്തുടർന്നു. അതിനിടെ ഇലകൾ കൂട്ടി മറച്ചുവെച്ച ബൈക്കിൻ്റെ ടയറു കണ്ടു. പിന്നെയും ഇത്തിരി നടന്നപ്പോൾ… ഓഹ്! ആ പഴയ ഷെഡ്ഢ്. വലിയ മാറ്റമൊന്നുമില്ല. മെല്ലെ വാതിലുതുറന്നു. ശ്രദ്ധിച്ചെങ്കിലും വാതിലു കരഞ്ഞു.. ഉള്ളിൽ നിന്നാരോ വിളിക്കുന്നു… കാലടിയൊച്ചകേട്ട ഞാൻ വീഞ്ഞപ്പെട്ടികൾക്കു പിന്നിലൊളിച്ചു.. അപ്പോഴാണ് അവർ! ആ സ്ത്രീ! ഞാൻ ഞെട്ടലോടെ കണ്ടു! എന്നെ വേട്ടയാടിയിരുന്ന പേടിസ്വപ്നം! പെട്ടെന്നാണ് അവരുടെ കൊഴുത്ത കാൽവണ്ണയിൽ ഒരണലി ചുറ്റിയത്! അവരുറക്കെക്കരഞ്ഞ് വശത്തേക്കോടി. ഞാൻ ശ്വാസമടക്കി അവിടെ നിന്നു. മേലു മുഴുവൻ വിറയ്ക്കുന്നുണ്ടായിരുന്നു! പെട്ടെന്നെന്തോ വീണു പിടയുന്ന ശബ്ദം. ഞാനവിടെ എത്തിനോക്കിയപ്പോൾ ചലനമറ്റ ശരീരം. അകത്തേക്ക് വന്നപ്പോൾ നിന്നെ കെട്ടിയിട്ടിരിക്കുന്നു. എൻ്റെ ചങ്കു തകർന്നുപോയെടാ… ബാക്കി നിനക്കറിയാം.
