അവളുടെ നിൽപ്പും ഗൗരവവും കണ്ടപ്പോൾ ഞാൻ ചെറുതായി ഒന്ന് പേടിച്ചു . ഇനി ഈ നാറി ഞാൻ ഫോണിൽ കൂടി കൊഞ്ചിയതും പറഞ്ഞതുമൊക്കെ കേട്ടോ എന്തോ ! എന്നാൽ വിശേഷം ആയി , എന്റെ ശവമടക്ക് ഇന്ന് ബെഡ് റൂമിൽ നടക്കും !
ഞാൻ ഉമ്മറത്ത് നിൽക്കുന്ന അവളെ നോക്കി ഒരു മങ്ങിയ ചിരി ചിരിച്ചു . അവൾ തിരിച്ചും എന്നെ നോക്കി പല്ലിളിച്ചു . പിന്നെ പെട്ടെന്ന് മുറ്റത്തേക്ക് ചാടിയിറങ്ങി എന്റെ നേരെ നടന്നടുത്തു . മുൻപോട്ടു നീങ്ങിയ മുടിയിഴ നീക്കി പുറകിലേക്കിട്ടു അവൾ എന്റെയടുത്തെത്തി .
“എന്താ ?”
അവളുടെ വരവിന്റെ വേഗം അളന്നുകൊണ്ട് ഞാൻ സ്വല്പം ഭയത്തോടെ ചോദിച്ചു .
“ഒന്നുമില്ല ? നീ എന്താ ഇവിടെ നിൽക്കുന്നെ ? കുറെ നേരം ആയല്ലോ ഫോണിൽ കൂടി സൊള്ളുന്നെ ?’
മഞ്ജുസ് എന്നെ അടിമുടി സംശയത്തോടെ നോക്കി കൈകൾ രണ്ടും തമ്മിലുരുമ്മി . ഒരുമാതിരി പോലീസുകാരുടെ ചോദ്യം ചെയ്യൽ പോലെ അവളെന്നെ കള്ളലക്ഷണത്തോടെ നോക്കി .
“ഓ..അതോ ..അതെന്റെ ഒരു ഫ്രണ്ട് ആയിരുന്നു ”
ഞാൻ സ്വല്പം പരുങ്ങലോടെ പറഞ്ഞൊപ്പിച്ചു അവളെ നോക്കി ചുണ്ടിലൊരു ചിരി വരുത്തി .
“ബോയ് ഫ്രണ്ടോ ? ഗേൾ ഫ്രണ്ടോ ?”
മഞ്ജു ഗൗരവത്തിൽ എന്നെ നോക്കി .
“ആരായാലെന്താ ? നീ എന്തിനാ ഇതൊക്കെ ചോദിക്കുന്നെ ?”
അവളുടെ ഗൗരവം കണ്ടു ഞാൻ ഒഴുക്കൻ മട്ടിൽ ചോദിച്ചു .
“അങ്ങനെ ആരായാലോന്നും പറ്റില്ല . ഇത്രേം കൊഞ്ചി കുഴയാൻ മാത്രം ആരായിരുന്നു അപ്പുറത്തു ?”
മഞ്ജുസിനു എന്റെ പെരുമാറ്റം കണ്ടു സംശയമായി .
“ആരാച്ചാര് ! നീ ഒന്ന് പോയെ ..’
ഞാൻ അവളെ ഫേസ് ചെയ്യാതെ തിരിഞ്ഞു നടക്കാൻ തുടങ്ങിയതും മഞ്ജുസ് എന്റെ മുൻപിൽ കയറി നിന്ന് .
“അങ്ങനെ പോവല്ലെടാ ചക്കരെ ..നിന്നെ എനിക്കത്ര വിശ്വാസം പോരാ..സത്യം പറയ് ആരായിരുന്നു. നിന്റെ റോസ്‌മേരി ആണോ ?”
മഞ്ജുസ് എന്നെ ചിരിയോടെ നോക്കി .
“ആഹ് ..ആണെന്ന് വെച്ചോ..ഇയാൾക്കിപ്പോ എന്താ വേണ്ടേ ?”
ഞാൻ പല്ലിറുമ്മി അവളെ നോക്കി.
“എനിക്കൊന്നും വേണ്ട ..പക്ഷെ മര്യാദക്ക് നടന്നില്ലേൽ ഉണ്ടല്ലോ ..”
മഞ്ജു എന്നെ നോക്കി അകണ്ണുരുട്ടി എന്റെ കോളറിൽ കുത്തിപ്പിടിച്ചു .
ഞൊടിയിട കൊണ്ട് രണ്ടു കയ്യും എന്റെ കോളറിൽ ബലമായി പിടിച്ചു മഞ്ജുസ് എന്നെ ഗേറ്റിലേക്ക് ചാരി നിർത്തി .ഞാൻ ആരേലും ആ മനോഹരമായ കാഴ്ച കാണുന്നുണ്ടോ എന്ന് നാണക്കേടിൽ ചുറ്റും നോക്കിയെങ്കിലും ആരും ഉണ്ടായിരുന്നില്ല.
