” അമ്മേ !!.. ” മഹേഷ്‌ അവിശ്വസനീയതയോട സാവിത്രിയെ നോക്കി .
ആശ്വാസത്തോടെ കാവേരി ആഹാരം കഴിക്കുന്നത് തുടര്‍ന്നത് കണ്ട മഹേഷ്‌ പിന്നെയൊന്നും പറഞ്ഞില്ല .
നീളന്‍ വരാന്തയിലെ ഇരുട്ടിലേക്ക് മാറി നിന്ന് ഒരു സിഗരറ്റ് വലിക്കുമ്പോള്‍ ഉള്ളില്‍ ലാന്‍ഡ്‌ ഫോണ്‍ ബെല്‍ അടിക്കുന്നത് മഹേഷ്‌ കെട്ടു . തുടര്‍ന്ന് ” മോളെ … കാവേരീ ..” എന്നുള്ള അമ്മയുടെ ആര്‍ത്ഥനാദം കൂടെ കേട്ടപ്പോള്‍ സിഗരറ്റ് വലിച്ചെറിഞ്ഞു മഹേഷ്‌ അകത്തേക്കോടി .
”എഹ് ..എന്നാ പറ്റി … ചേച്ചീ … അയ്യോ ..”
നിലത്തേക്ക് വീണു കിടക്കുന്ന റിസീവറും താഴെ ബോധമറ്റ്‌ കിടക്കുന്ന കാവേരിയെയും കണ്ട മഹേഷ്‌ കരഞ്ഞുകൊണ്ട്‌ അടുക്കളയിലേക്കോടി .
”ചേച്ചീ …ഡി ..എന്നാ ..എന്നാ പറ്റീഡീ …അമ്മേ … എന്നതാ ” കപ്പില്‍ കൊണ്ടുവന്ന വെള്ളം മുഖത്തേക്ക് തളിച്ച് കാവേരിയുടെ തല കുലുക്കിക്കൊണ്ട്‌ മഹേഷ്‌ അമ്മയെയും ചേച്ചിയെയും മാറി മാറി നോക്കി .
മുഖത്ത് വെള്ളം വീണപ്പോള്‍ കണ്ണ് ചിമ്മി തുറന്ന കാവേരി മഹേഷിനെ കണ്ടതും പൊട്ടിക്കരഞ്ഞുകൊണ്ട് അവനെ തന്നിലേക്ക് വരിഞ്ഞുമുറുക്കി
”എന്നതാ ..എന്നതാടീ ചേച്ചീ .. അയാള് ..അയാള് വല്ലോം പറഞ്ഞോ … പോകാന്‍ പറ അയാളോട് . അല്ലേല്ലും നമ്മള് വേണ്ടാന്ന് വെക്കാനിരുന്നത് അല്ലെ … അമ്മേ ഇവളോട്‌ ഒന്ന് പറഞ്ഞു കൊടുക്ക്‌ ..ശ്ശെ … പോട്ടേന്ന്.. നിനക്കിഷ്ടമില്ലേല്‍ ആരും ഇവിടെനിന്നു നിന്നെ കൊണ്ടുപോകത്തില്ല ..ഞങ്ങള് പറഞ്ഞും വിടത്തില്ല .. ” അവന്‍ കാവേരിയുടെ മുഖത്തും തലയിലും തലോടി ആശ്വസിപ്പിച്ചു കൊണ്ട് സാവിത്രിയെ നോക്കി പറഞ്ഞു.
”അത് ..അതല്ല മോനെ … സംഗീത ..അവള്‍ .. ”
”എഹ് ..അവള്‍ക്കെന്നാ പറ്റി ?” സാവിത്രി ഉദ്വേഗത്തോടെ ചോദിച്ചതും മഹേഷ്‌ ഒന്നും മനസ്സിലാകാതെ അവരെ നോക്കി .
സംഗീത … കേട്ടിട്ടുണ്ടല്ലോ ഈ പേര്!!
”’ അവള്‍ ആരുടെയോ കൂടെ ഒളിച്ചോടി പോയമ്മേ … ”’
”എന്റെ ദേവീ ..ഈ സമയത്തിങ്ങനെ ..എന്നെ എന്തിനിങ്ങനെ പരീക്ഷിക്കുന്നു ദേവീ ” സാവിത്രി തലയില്‍ കൈവെച്ചുകൊണ്ട് ഭിത്തിയിലെക്ക് ചാരി .
