നമ്മൂരു ബെംഗളൂരു

Nammuru Bengaluru

വർഷങ്ങൾക്കുമുൻപ് ഞാൻ എഴുതി പകുതിക്കുവെച്ചു നിർത്തിയ ‘ചെന്നൈയിൽ ഒരു മഴക്കാലം’ എന്ന സീരിസിന്റെ തുടർച്ച എഴുതാൻ ആണ് ആദ്യം ശ്രമിച്ചത്. പക്ഷെ ഒരു ഫ്ലോ കിട്ടിയില്ല. അതോണ്ട് പുതിയൊരു കഥയെഴുതാം എന്നുകരുതി. ഇനി വഴിയിലിട്ടുപോകാതിരിക്കാൻ ശ്രമിക്കാം.

നല്ല മഴപെയ്യുന്നൊരു ദിവസമായിരുന്നു. കയ്യിലിരുന്ന ലീവുകൾ തീർന്നതുകൊണ്ടും, മാനേജർ വിളിച്ചു അറഞ്ചം പുറഞ്ചം ഹിന്ദിയിൽ തെറി പറഞ്ഞതുകൊണ്ടും അന്ന് വൈകുന്നേരം തന്നെ ബാംഗ്ളൂരേക്കുള്ള ടിക്കറ്റ് ബുക്ക് ചെയ്തു. ഏസി സെമി സ്ലീപ്പർ ആണ്. ബസ് കാത്ത് ചെറിയൊരു ആൾക്കൂട്ടം തന്നെ കോട്ടയം സ്റ്റാൻഡിൽ ഉണ്ടായിരുന്നു. ആകെ കയ്യിൽ ഉള്ളൊരു ബാഗും എടുത്ത്, ഡ്രൈവർ അണ്ണാച്ചിയെ ടിക്കറ്റും കാണിച്ചു ഞാൻ അകത്തുകയറി. ബാഗ് എടുത്തു ബസിന്റെ ഇടതു വശത്തുള്ള എന്റെ സീറ്റിനു മുകളിൽ വെക്കാൻ ശ്രമിക്കുമ്പഴാണ് ഒരു പഞ്ഞിക്കെട്ട് മുതുകിൽ ഉരസി കടന്നുപോയത്.