അവൾ സംശയത്തോടെ മഞ്ജുവിനെ നോക്കി.
“ആഹ്..എന്താ ..?”
മഞ്ജു നടക്കുന്നതിനിടെ അവളെ നോക്കി.
“ഒന്നുമില്ല ചോദിച്ചെന്നെ ഉള്ളു..”
അവൾ പുഞ്ചിരിച്ചുകൊണ്ട് പറഞ്ഞു..
“ഹായ്…ഞാൻ അശ്വതി..അച്ചു ന്നു വിളിക്കും “
ആ പെൺകുട്ടി സ്വയം പരിചയപെടുത്തികൊണ്ട് എന്റെ നേരെ കൈനീട്ടി. ഞാൻ ആ കൈത്തലം പിടിച്ചു കുലുക്കികൊണ്ട് എന്നെയും പരിചയപ്പെടുത്തി..അതുപോലെ ശ്യാമും ! പക്ഷെ അവൻ ആ പെണ്ണിന്റെ കൈ വിടാൻ ഒന്ന് മടിച്ചു..സ്വല്പം ബല പ്രയോഗം വേണ്ടി വന്നെന്നു തോന്നുന്നു അവൾക്ക് കൈപിൻവലിക്കാൻ ! അവളും അതാസ്വദിച്ചെങ്കിലും മഞ്ജുസിനു അതത്ര ഇഷ്ടമായില്ല..
മഞ്ജുസ് ശ്യാമിനെ ഒന്ന് തറപ്പിച്ചു നോക്കി .
“ഹാ..കാര്യമാക്കണ്ട ..ഒരു തമാശ അല്ലെ “
ഞാൻ മഞ്ജുസിന്റെ ദേഷ്യം കണ്ടപ്പോൾ ചെവിയിൽ പതിയെ പറഞ്ഞു. അതോടെ കക്ഷിയൊന്ന് തണുത്തു.
ഞങ്ങൾക്കായി ഗസ്റ്റ് റൂം തുറന്നു തന്ന ശേഷം മഞ്ജു മടങ്ങി . കുറച്ചു കഴിഞ്ഞു വരാമെന്നു പറഞ്ഞു ശ്യാം കാണാതെ കവിളിലൊരു ഉമ്മയും വെച്ചാണ് മഞ്ജു മടങ്ങിയത്. മറ്റേ കുട്ടിയെ ആദ്യമേ മഞ്ജു പറഞ്ഞു വിട്ടിരുന്നു .
ഞാനും ശ്യാമും ബാത്‌റൂമിൽ കയറി ഒന്ന് ഫ്രഷ് ആയി. പിന്നെ ഉല്സവം ഒക്കെ അല്ലെ..കൊണ്ടുവന്ന ബാഗിൽ നിന്ന് ഒരു വെള്ളമുണ്ടും ഷർട്ടും ഒക്കെ എടുത്തണിഞ്ഞു .
അങ്ങനെ എല്ലാം കഴിഞ്ഞു പുറത്തിറങ്ങാൻ തുടങ്ങുമ്പോഴാണ് മഞ്ജുസ് അമ്മയേം മുത്തശ്ശിയെയെയും കൂട്ടി അങ്ങോട്ടേക്ക് കയറി വന്നത് . ശോഭന എന്നാണ് മഞ്ജുസിന്റെ അമ്മയുടെ പേര് . മുത്തശ്ശിയുടെ പേര് ജാനകി !
സെറ്റ് സാരിയാണ് രണ്ടാളുടെയും വേഷം . മുത്തശ്ശി സ്വല്പം ഭക്തി മാർഗം ആണെന്ന് എനിക്ക് അപ്പിയറൻസ് കണ്ടപ്പോൾ തോന്നി , നെറ്റിയിൽ വലിയ കുറിയും കഴുത്തിൽ രുദ്രാക്ഷ മാലയും കൈയ്യിൽ ചരടും എല്ലാം ഉണ്ട് !എഴുപത്തഞ്ചു കഴിഞ്ഞെങ്കിലും അത്യാവശ്യം ആരോഗ്യം ഒക്കെ ഉള്ള കൂട്ടത്തിലാണ് മുത്തശ്ശി .
അമ്മ നോർമൽ അപ്പിയറൻസ് ആണ്. കഴുത്തിൽ താലിമാല മാത്രം..കാതിൽ സ്വർണത്തിന്റെ കമ്മലും വലതു കയ്യിൽ ഒന്ന് രണ്ടു വളയും ഉണ്ട്. സ്വത്തും പണവും ഒക്കെ ഉണ്ടെങ്കിലും അത്ര ആഡംബര പ്രിയ അല്ല എന്റെ അമ്മായിയമ്മ .
പക്ഷെ മഞ്ജുസ് നേരെ തിരിച്ചാണ് ! ഷോപ്പിംഗ് എന്നൊക്കെ പറഞ്ഞു കണ്ടതൊക്കെ വാങ്ങിച്ചു കൂട്ടും. എന്നിട്ട് ഇടുന്നതു, ഒന്നോ രണ്ടോ വട്ടം. അതും പറഞ്ഞു ഞാനും അവളും വഴക്കിടാത്ത ദിവസങ്ങൾ കുറവാണു .തലയിണ എടുത്തു എന്നെ അടിച്ചാണ് മഞ്ജുസ് അരിശം തീർക്കുക.
