“മ്മ്…ഇപ്പൊ എങ്ങനെ ഉണ്ട്..വേദന ഉണ്ടോ ?”
പുള്ളിക്കാരി എന്റെ അടുത്തേക്ക് നീങ്ങി പൾസ്‌ ഒകെ ചെക്ക് ചെയ്തുകൊണ്ട് തിരക്കി .പിന്നെ ഡ്രിപ് ഇട്ടിരുന്നത് മാറ്റി പുതിയതൊന്നിട്ടു .
“അഹ്..വേദന ഒകെ ഉണ്ട്..”
ഞാൻ സ്വല്പം ഞെരക്കത്തോടെ പറഞ്ഞു .
“മ്മ്..കാണും കാണും ..രക്ഷപെട്ടത് തന്നെ മഹാഭാഗ്യം ”
അവർ ചെറിയൊരു ചിരിയോടെ പറഞ്ഞു .
“ആരെയെങ്കിലും കാണണോ ? ഞാൻ പുറത്തു പോയി ഇയാൾക്ക് ബോധം വന്നത് അറിയിക്കാം . ”
ഡ്രിപ് മാറ്റിയിട്ട് പുള്ളിക്കാരി ചിരിയോടെ തിരക്കി.
പെട്ടെന്ന് മഞ്ജുസ് എന്നാണ് നാവിലേക്ക് ഓടിക്കയറിയതെങ്കിലും അപകടത്തിന് മുൻപ് നടന്ന ഇഷ്യൂ ഓർത്തപ്പോൾ എനിക്കവളെ കാണാൻ തോന്നിയില്ല. അത്രമാത്രം അവളെന്നെ കുത്തിനോവിച്ചിട്ടുണ്ട് !പക്ഷെ അബോധാവസ്ഥയിൽ എന്റെ കണ്ണിൽ നിറഞ്ഞ മുഖം അത്രയും മഞ്ജുസിന്റേതായിരുന്നു !
”അമ്മ….എന്റെ അമ്മയോട് വരാൻ പറയുമോ ?”
ഞാൻ സ്വല്പ നേരം ആലോചിച്ചിട്ട് ചെറിയൊരു കണ്ണീരോടെ പറഞ്ഞു .ഒടുവിലെ ആശ്രയം ആണല്ലോ അമ്മ !
“ആഹ്..പറയാം..”
അവര് ചിരിയോടെ പറഞ്ഞു പുറത്തേക്കിറങ്ങി .
പിന്നെ സ്വല്പം കഴിഞ്ഞതും എന്റെ അമ്മ റൂമിനകത്തേക്കെത്തി . എന്ന കണ്ടതും അമ്മയിലൊരു തേങ്ങൽ ഉണ്ടായി. അവർ തേങ്ങിക്കൊണ്ട് തന്നെ പയ്യെ പയ്യെ എന്റെ അടുത്തേക്ക് നടന്നടുത്തു .
“കണ്ണാ…മോനേ….”
അമ്മ പയ്യെ വിളിച്ചുകൊണ്ട് എന്റെ കൈത്തലം മുറുകെ പിടിച്ചു ശബ്ദമില്ലാതെ കരഞ്ഞു .
“ആഹ്..കരയല്ലേ അമ്മാ ..എന്താ ഉണ്ടായത് ? എനിക്കൊന്നും ഓര്മ ഇല്ല..?”
ഞാൻ ചെറിയൊരു പുഞ്ചിരിയോടെ തിരക്കി .
“അതൊക്കെ പിന്നെ പറയാം കണ്ണാ..നിനക്കിപ്പോ എങ്ങനെ ഉണ്ട് ? ”
അമ്മ കണ്ണ് തുടച്ചു ചെറിയൊരു ആശ്വാസത്തോടെ തിരക്കി .
“കുഴപ്പല്യ….”
ഞാൻ പയ്യെ പറഞ്ഞു .
“മ്മ്..എന്നാൽ കുഴപ്പം ഉള്ള ഒരാളു പുറത്തുണ്ട് .നിന്റെ ഭാര്യ ! എന്താ കണ്ണാ നിങ്ങള് തമ്മിൽ പ്രെശ്നം ?”
മഞ്ജുസുമായുള്ള എന്റെ വഴക്ക് ഓർത്തു അമ്മ തിരക്കി .
“ഏയ് ഒന്നും ഇല്ല. അതിനു വട്ടാ അമ്മാ . എനിക്കതിനെ കാണാൻ കൂടി താല്പര്യം ഇല്ല്യ. അത്രക്ക് അന്ന് പറഞ്ഞു കൂട്ടിയിട്ടുണ്ട് ..”
ഞാൻ വേദനയുടെ ഞെരക്കത്തിലും സ്വല്പം ഉറക്കെ പറഞ്ഞു .
“പോടാ . അങ്ങനെ ഒന്നും പറയല്ലേ കണ്ണാ . ഇതിനാണോ ഞങ്ങളോടൊക്കെ വഴക്കിട്ട് നീയവളെ കല്യാണം കഴിച്ചത് ? [അമ്മയെന്നെ ചോദ്യ ഭാവത്തിൽ നോക്കി ] അത് പുറത്തു നിൽക്കുന്നുണ്ട് മോനെ . പാവം കരഞ്ഞു കരഞ്ഞു അതിനു വയ്യാണ്ടായിട്ടുണ്ട് .നിന്റെ കാര്യം അറിഞ്ഞപ്പോ തൊട്ട് പ്രാന്ത് പിടിച്ച പോലെ വീട്ടിൽ കിടന്നു അലറാൻ തുടങ്ങിയതാ . എല്ലാത്തിനും കാരണം അവളാണെന്നു പറഞ്ഞു ഒരേ കരച്ചിലും ബഹളവും ആണ് .ഇവിടെ വന്നു നിന്നെ കണ്ടപ്പോ ബോധം കെട്ട് വീണിട്ട് എന്തൊക്കെയോ പിച്ചും പേയും
