വെളുത്ത ഷർട്ടും മുണ്ടുമുടുത്ത മെമ്പർ കണാരന്റെ മുപ്പത്തിരണ്ട് പല്ല് കാണിച്ചുള്ള ചിരി പൊടുന്നനെ നിന്നു . ദീനാമ്മേടെ നാവിനെല്ലില്ലായെന്നു ആർക്കുമറിയാം .
“‘ തോമാച്ചനെ ഒന്ന് കാണണം . പദയാത്ര വരുവല്യോ ? ഇച്ചിരി കാശുമുടക്കുണ്ട് .നാട്ടിലെ പ്രമാണികളോടല്യോ ചോദിക്കേണ്ടത് .അല്ലാതെ ദീനാമ്മച്ചിയോട് ചോദിച്ചാൽ വല്ലോം കിട്ടുമോ ?”
“‘എന്റെ മെമ്പറെ ..തോമാച്ചൻ യാതൊരു ദുശ്ശീലവും ഇല്ലാതെ അധ്വാനിച്ചു ഉണ്ടാക്കിയ കാശാ .ദേ എന്റെ വീട് കണ്ടോ . പഞ്ചായത്തീന്നു കിട്ടിയ മൂന്നു ലക്ഷത്തിന് മൊത്തം പണിയും തീർത്തു . വേറെ ഏതു കോൺട്രാക്ടർ ആണേലും അതിൽ പാതി മുക്കും ,എന്റെ അനിയത്തി കണ്ടിട്ട് പറയുവാ അതേ പോലൊന്ന് അവളുടെ വീടിന്റെയടുത്തു പണിതിട്ട് രൂപാ ആറേഴു ലക്ഷം ആയെന്ന് . അഞ്ചുപൈസ കക്കാതേം മോട്ടിക്കാതേം ഉണ്ടാക്കിയ പൈസയാ . നിങ്ങളീ ധൂർത്തിന്‌ പിടിച്ചു പറിച്ചു വാങ്ങുന്നെ . ആട്ടെ ..എന്നാത്തിനാ ഈ പദയാത്ര ?”
“” ലോകസാമ്പത്തിക മാന്ദ്യത്തിനെതിരെ , വിലക്കയറ്റത്തിനെതിരെ . പാവപ്പെട്ട ആളുകൾക്കിവിടെ ജോലിയുണ്ടോ ? കാർഷിക വിളകൾക്കിവിടെ വിലയുണ്ടോ ? “‘
മെമ്പർ കത്തിക്കയറി
“”ആ ,… നിർത്തുനിർത്തു . ആളുകൾക്കിവിടെ ജോലിയില്ലന്ന് അറിയാം ..കാർഷിക വിളകൾക്കിവിടെ വിലയും ഇല്ലന്നറിയാം .എന്നിട്ടും പിരിവിനിറങ്ങിയേക്കുവാ അല്ലെ മെമ്പറെ . ദേ എമിലി പാവം കോഴി വളർത്തിയും കൃഷി ചെയ്തും തോമാച്ചന്റെ മിച്ചം കൊണ്ടുമൊക്കെയാണ് ഇതുവരെയെത്തിയത് . അതും പിടിച്ചു വാങ്ങിക്കോ .”‘
”അതുകൊണ്ടല്ലേ ദീനാമ്മച്ചീ നമ്മുടെ പഞ്ചായത്തിലെ ആറിന് കുറുകെയുള്ള പാലം പണി തോമാച്ചന് തന്നെ വാങ്ങിക്കൊടുത്തത് . നമ്മുടെ നാട്ടിലെ കോൺട്രാക്ടറെ സഹായിക്കാതിരിക്കാൻ പറ്റുമോ ? എത്ര പേരെ തഴഞ്ഞിട്ടാണെന്നോ തോമാച്ചനീ കോണ്ട്രാക്റ്റ് ഞാൻ മേടിച്ചു കൊടുത്തത് . “”
“‘ഉവ്വുവ്വ ..തോമാച്ചൻ പാവമായത് കൊണ്ട് അയാളെ പിഴിഞ്ഞ് കുടിക്കാം .അത് തന്നെ കാര്യം “”
“‘ ഞാൻ പോയേച്ചും വരാം ”’
ഇനി നിന്നാൽ ശെരിയാവില്ലന്ന് മനസിലായ മെമ്പർ കണാരൻ പതിയെ ഗേറ്റ് തുറന്നകത്തേക്ക് കയറി .
“‘തോമാച്ചനവിടെയില്ല മെമ്പറെ “‘
പുറകിൽ നിന്ന് ദീനാമ്മ വിളിച്ചു പറഞ്ഞത് മെമ്പർ കേട്ടില്ല . അല്ലെങ്കിൽ കേട്ടതായി ഭാവിച്ചില്ല .
“‘തോമാച്ചോ .. പൂയ് “”
