വിപ്രതീസാരം
“റിയയോടുള്ള ദേഷ്യം ആണേൽ ഇതല്ല അതിനു പരിഹാരം… അവൾക്കു മുന്നിൽ ജീവിച്ചു കാണിക്കണം. നിന്നെ തേടിയെത്തിയതുപോലെ അവളെയും തേടിയെത്തും ഒരു വിധി.”
ആനിയുടെ ആശ്വാസ വാക്കുകളിൽ അലക്സ് കഴുത്തിലെ കുരുക്കഴിച്ചു താഴെ ഇറങ്ങി. അവന്റെ മാനസികാവസ്ഥയിൽ അവനു പൊട്ടിക്കരയാനേ അറിയുള്ളായിരുന്നു. ആനിയുടെ മാറിൽ മുഖം താഴ്ത്തി പൊട്ടിക്കരഞ്ഞു.
“മമ്മാ….”
“ഞാൻ ഒരു നിമിഷം വൈകിയിരുന്നേൽ നീ എന്താകുമായിരുന്നു… ”
“മടുത്തു മമ്മീ ജീവിതം…അവളുടെ വഴിവിട്ട ബന്ധങ്ങളിൽ പോലും അവളെ ഞാൻ വെറുത്തിരുന്നില്ല. എനിക്കവളോട് പ്രേമം ആയിരുന്നു. എന്നാൽ എന്നെ പപ്പാ ന്ന് വിളിക്കാൻ പാപ്പാടെ കുഞ്ഞിനെ തരാം എന്ന് പറഞ്ഞപ്പോൾ ഞാൻ തകർന്നു പോയി.. ”
“നീ അതിനു ഇങ്ങനെ ചെയ്യണം ആയിരുന്നോ?”
“ഡിവോഴ്സ് നെ പറ്റി പറഞ്ഞപ്പോൾ ജോയിന്റ് പെറ്റിഷനുള്ള പേപ്പറിൽ എന്നെ കൊണ്ടവൾ ഒപ്പ് വെപ്പിച്ചു.എല്ലാ കണക്കു കൂട്ടലും തെറ്റി ഞാൻ അവിടെന്നിറങ്ങിയപ്പോൾ ഒരു ലക്ഷ്യമേ ഉണ്ടായിരുന്നുള്ളൂ…റിയയോട് എനിക്ക് ജയിക്കണം.”
“എന്നിട്ടാണോ നീ ആത്മഹത്യക്ക്”
“മമ്മീ… ഞാൻ ഷിബിലിയെ പറ്റിക്കുക ആയിരുന്നു. പാടില്ലാത്ത ബന്ധം ആണെന്നവൾ പറഞ്ഞിട്ടും മിന്നു കെട്ടും എന്നവളെ പറഞ്ഞു പറ്റിച്ചു. എന്റെ ആഗ്രഹങ്ങൾ സാധിച്ചു. റിയയുമായുള്ള കല്യാണം വരെ ഞാൻ അവളിൽ നിന്നു മറച്ചു. ഒടുവിൽ അവളത് അകന്നപ്പോൾ അവൾ പറഞ്ഞു വയറ്റിൽ വളരുന്ന കുഞ്ഞിനെ എനിക്കുമുന്നിലിട്ട് വളർത്തുമെന്നു.മാപ്പ് പറഞ്ഞവളെ കൂട്ടികൊണ്ട് വരാൻ പോയപ്പോൾ അവൾ ഗർഭവവും അലസിച്ചു മറ്റൊരാളുടെ ഭാര്യ. സ്വന്തം ചോരയിൽ ഒരു കുട്ടിയെ കിട്ടാൻ ഭാഗ്യമില്ലാതെ അവിടേം ഞാൻ പരാജയപ്പെട്ടു.”
ഷിബിലി എന്ന് അലക്സ് പറഞ്ഞപ്പോൾ ആനി ഒന്ന് ഞെട്ടി . അലക്സിന്റെ ഏറ്റു പറച്ചിലിൽ ആനി മറ്റൊരു ഓർമയിൽ ആയിരുന്നു.
“ത്രേസ്യേച്ചി എന്നതാ പറയുന്നേ അവൾക്കിരുപത് വയസ്സ് പോലും ഇല്ല. പ്രായത്തിന്റെ ചാപല്യത്തിൽ അവൾക്കു പറ്റിയ കൈയബദ്ധം. അത്രേ ഉള്ളൂ. അവളാ വയറ്റിൽ വളരുന്ന കുഞ്ഞിനെ പെറ്റാൽ അവളുടെ ജീവിതം ഉരുകി തീരത്തെ ഉള്ളൂ. തന്ത ആരെന്നറിയാത്ത കുഞ്ഞിനേയും കൊണ്ടവൾ ജീവിക്കുന്നതിനേക്കാൾ ഞാൻ ആഗ്രഹിക്കുന്നത് മറ്റൊരാളുടെ ഭാര്യയായി അവൾ ജീവിക്കുന്നത് കാണാൻ ആണ്. അതിനാ ഗർഭം ഒരു തടസ്സം ആണ്. അത് നമ്മൾ പിഴുതു മാറ്റുന്നു. അത്രേ ഉള്ളൂ.”
“ഇതവൾ കുടിക്കുമോ?”
“ഇതവൾ കുടിച്ചില്ലേൽ വേറെ മരുന്നൊക്കെ എന്റെൽ ഉണ്ട് ചേച്ചി. ഞാനേ ഒരു ഗൈനക്കോളജിസ്റ്റ് ആണ്. പേറു എടുക്കാൻ മാത്രമല്ല. ഗർഭം അലസിക്കാനും ഡോക്ടർ ആനി ഫിലിപ്പിനറിയാം.”
ആനി അതും പറഞ്ഞു. മുറിച്ചു വെച്ച പപ്പായയും പൈനാപ്പിളും മിക്സിയിലേക്ക് ഇട്ടു ഓണാക്കി.
(ശുഭം)
ആനി ചെയ്തത് രണ്ടു ആംഗിളിൽ നിന്നു ചിന്തിച്ചു നോക്കിയിട്ടും തെറ്റോ ശെരിയോ എന്ന് എനിക്കുത്തരം കിട്ടിയില്ല.
