ഹാളിൽ നിന്നും പുറത്തു ഇറങ്ങിയതോടെ മൊട്ട പിള്ളേരെ കണ്ടു അച്ഛനും അമ്മയും മഞ്ജുസിന്റെ അമ്മയും ഒക്കെ കൗതുകത്തോടെ നോക്കി . പിന്നെ ഓരോരുത്തരായി ആദിമോനെ വന്നെടുത്തു അവന്റെ ചന്തം നോക്കി . പക്ഷെ റോസിമോള് മാത്രം ഒന്നിനും കൂട്ടാക്കാതെ എന്നെ അള്ളിപ്പിടിച്ചു കിടന്നു .
“ഇവളെടെ സങ്കടം തീർന്നില്ലേ …”
പെണ്ണിന്റെ കരച്ചിൽ ഒകെ പുറത്തുനിന്ന് കണ്ട അഞ്ജു ചിരിയോടെ തിരക്കി . പിന്നെ റോസിമോളെ തട്ടിവിളിച്ചു . പക്ഷെ പെണ്ണ് അഞ്ജുവിന്റെ കയ്യിൽ അടിച്ചുകൊണ്ട് ദേഷ്യം അറിയിച്ചു .
“ചാ ചാ ഹ്ഹ്ഹ് ..”
പിന്നെ എന്നെ നോക്കി ചുണ്ടു കടിച്ചു സങ്കടപ്പെട്ടു .
“അയ്യോടി……എന്തിനാ ചാച്ചന്റെ മുത്ത് കരയണേ ? ഒന്നും ഇല്യാടി പെണ്ണെ ”
ഞാൻ അവളുടെ കവിളിൽ അമർത്തി ചുംബിച്ചുകൊണ്ട് ചിരിച്ചു . പിന്നെ അവളുടെ സങ്കടം മാറ്റാൻ വേണ്ടി അവളെയും എടുത്തു നടന്നു .
“നിങ്ങള് വിട്ടോ …ഞാൻ റൂമിലേക്ക് വരാം …”
മഞ്ജുസിനോടും ബാക്കിയുള്ളവരോടും പറഞ്ഞു ഞാൻ റോസിമോളെ എടുത്തു നടന്നു . പിന്നെ അവളുടെ സങ്കടം മാറ്റാൻ വേണ്ടി കടയിൽ നിന്നു ടോയ്സും പാവയും ഒക്കെ വാങ്ങി . അതോടെ പെണ്ണിന്റെ മുഖം ഒന്ന് തെളിഞ്ഞു .
അതൊക്കെ വാങ്ങി പിന്നെ ഒരു കുതിരവണ്ടി സവാരി കൂടി നടത്തി ഞങ്ങള് ഹോട്ടലിന്റെ മുന്നിൽ ചെന്നിറങ്ങി . അപ്പോഴേക്കും റോസിമോള് നോർമൽ ആയി . പഴയ പോലെ ചിരിക്കാനും കളിക്കാനും ഒകെ തുടങ്ങി . കുതിരക്കാരന് പൈസയും കൊടുത്തു ഞാൻ വാങ്ങിച്ച സാദനങ്ങൾ ഒകെ എടുത്തു റൂമിലേക്ക് പോയി . പിന്നെ വൈകുന്നേരം വരെ ഞങ്ങള് സംസാരവും കളിചിരിയുമൊക്കെ ആയി റൂമിൽ തന്നെ കൂടി .
വൈകീട്ടത്തെ കുളിയും വേഷം മാറലും ഒക്കെ കഴിഞ്ഞു പിന്നെ മലകേറാനുള്ള ഒരുക്കത്തിനായി വീണ്ടും പുറത്തിറങ്ങി .
അഞ്ചുമണി ഒക്കെ ആയപ്പോഴാണ് ഞങ്ങൾ ദർശനത്തിനായി ഇറങ്ങിയത് . നടന്നു കയറാം എന്നുതന്നെ ആയിരുന്നു പ്ലാൻ . പിറ്റേന്ന് രാവിലെയും കയറാനുള്ള പ്ലാൻ ഉണ്ട് . അതുവേണമെങ്കിൽ റോപ്പിലോ ട്രെയിനിലോ ആക്കാമെന്നും കരുതി .
സെറ്റ് സാരിയും ബ്ലൗസും തന്നെയായിരുന്നു മഞ്ജുസിന്റെ വേഷം . ഞാൻ ഒരു വെള്ളമുണ്ടും ചുവന്ന ഷർട്ടും ആണ് ധരിച്ചിരുന്നത് . പിള്ളേര് പണിപറ്റിക്കാതിരിക്കാൻ സ്നഗ്ഗി ഒകെ ഇട്ടുകൊടുത്ത ശേഷം അതിനു മുകളിൽ ആണ് ഉടുപ്പും നിക്കറും ഒകെ ഇട്ടുകൊടുത്തത്.
വൈകീട്ടും ഭക്തി സാന്ദ്രമായ അന്തരീക്ഷം തന്നെയാണ് . ചുവന്ന ചക്രവാളവും വൈകിട്ടത്തെ കുളിരുള്ള കാറ്റും അതിനു അകമ്പടി സമ്മാനിക്കുന്നുണ്ട് . ഒപ്പം പഴനിമലയിലെ ദീപാലങ്കാരവും അങ്ങിങ്ങായി തെളിഞ്ഞു തുടങ്ങിയിട്ടുണ്ട് .
ഇത്തവണ ഞാനും മഞ്ജുസും ഒപ്പം ആണ് നടന്നത് . പിള്ളേരെ അഞ്ജുവും അച്ചുവും കീർത്തനയും അടങ്ങുന്ന ടീം ഏറ്റെടുത്തിരുന്നു . നടവഴിയും കഴിഞ്ഞു ഞങ്ങൾ പ്രധാന കവാടത്തിലെത്തി . അവിടെനിന്നും പിന്നെ മലയുടെ സ്റ്റെപ്പുകൾ തുടങ്ങുകയാണ് .ആയിരത്തിലേറെ പടവുകൾ ഉണ്ട് .
