ബലൂണും വരണകടലാസും ഒക്കെ കൊണ്ട് ഹാളും ഉമ്മറവും ഒകെ ഞങ്ങൾ അലങ്കരിച്ചു .മഞ്ജുസിന്റെ കസിന്സും അഞ്ജുവും വീണയും ഒകെകൂടി ആ സമയത് പിള്ളേരെ കൊഞ്ചിക്കുന്ന തിരക്കിലായിരുന്നു . ഇടക്കു ശ്യാമിനെ കാണുമ്പോൾ മാത്രം വീണ ഒന്നിളകും . പിന്നെ കണ്ണും കണ്ണും കഥകൾ കൈമാറുന്ന അനുരാഗമാണ് .ഞാനോ മഞ്ജുവോ ശ്രദ്ധിക്കുന്നുണ്ടെന്നു മനസിലായാൽ രണ്ടും കൂടി എങ്ങോട്ടേലും വലിയും .
അതിനിടെ ഫോട്ടോഗ്രാഫർ വന്നതോടെ എനിക്ക് വിളിയെത്തി . പിള്ളേരുടെ ഒപ്പം നിന്നുള്ള ഫോട്ടോ എടുക്കാൻ വേണ്ടി മഞ്ജുസിന്റെ ചെറിയമ്മ ആണ് എന്നെ വന്നു വിളിച്ചത് .
“നീ ഇവിടെ നിക്കുവാണോ കവിനെ …വന്നേ ..നിന്നെ അവിടെ അന്വേഷിക്കുന്നുണ്ട് ”
കൃഷ്ണൻ മാമയുമായി സംസാരിച്ചു നിന്നിരുന്ന എന്റെ അടുത്തെത്തി ശൈലജ ചെറിയമ്മ ചിരിയോടെ മൊഴിഞ്ഞു .
“അവിടെ ആകെ പെണ്ണുങ്ങളുടെ ബഹളം ആണ് …അവരോടു പൊറത്തോട്ടു വരാൻ പറ ..ഫോട്ടോ പുറത്തുവെച്ചും എടുക്കാലോ ..”
ഉള്ളിലെ ബഹളം കാരണം ഞാൻ പയ്യെ പറഞ്ഞു .അപ്പോഴേക്കും വീണയും അഞ്ജുവും സയാമീസ്‌ ഇരട്ടകളെ പോലെ ഒട്ടികൊണ്ട് അങ്ങോട്ടേക്കെത്തി .
“പിള്ളേരുടെ അച്ഛനെ അവിടെ അന്വേഷിക്കുന്നുണ്ട് …ഒന്ന് ചെന്നെ …”
വീണ എന്നെ ഒന്നാക്കികൊണ്ട് ചിരിച്ചു .
“ഇങ്ങോട്ടു വരാൻ പറ …എനിക്കൊന്നും വയ്യ അതിനകത്തോട്ട് കേറാൻ ”
ഞാൻ പിന്നെയും ബലം പിടിച്ചു .
“ചെല്ലെടാ കണ്ണാ …ചടങ്ങ് ഒക്കെ ഉണ്ട് ..പിള്ളേരുടെ ജാതകം ഒകെ വായിക്കണ്ടേ ..”
കൃഷ്ണൻ മാമ കൂടി എന്നെ നിർബന്ധിച്ചു .
“ഇതിന്റെ ഒന്നും ഒരാവശ്യം ഇല്ലായിരുന്നു …നിങ്ങള് ഈ കാരണവന്മാരാണ്‌ ഓരോ പൊല്ലാപ്പ് ഉണ്ടാക്കി വെക്കുന്നത് ”
