പിന്നെ സ്വയം ചൂണ്ടിക്കാണിച്ചുകൊണ്ട് അവൾ എന്നെ നോക്കി .” ഞാനോ ?” എന്ന ഭാവം ആയിരുന്നു റോസമ്മക്ക് !
“അതെ ..നീ തന്നെ …”
ഞാൻ പയ്യെ ചിരിച്ചു .
“ശൊ..ഇതെന്നാ തേങ്ങയാ നിങ്ങളീ പറയുന്നേ..എനിക്കൊന്നും മനസിലാവണില്ല”
ഞങ്ങളുടെ അവിടേം ഇവിടേം തൊടാത്ത സംസാരം കേട്ട് റോസമ്മ ചൂടായി .
“ഒക്കെ പറയാം റോസമ്മോ..പക്ഷെ വേറാരും കേൾക്കണ്ട..സീക്രട്ട് ആണ്..”
ഞാൻ പയ്യെ പറഞ്ഞു മഞ്ജുസിനെ നോക്കി .
കാര്യം മനസിലായ അവൾ അതോടെ എഴുനേറ്റു ചെന്ന് ഞങ്ങളുടെ റൂമിന്റെ വാതിൽ അടച്ചു . ഇനി അമ്മയും അഞ്ജുവും ഒന്നും ഞങ്ങളുടെ വഴക്കിന്റെ കാര്യം അറിയണ്ട എന്ന് കരുതിയാണ് ആ തീരുമാനം .
“താൻ പറയുന്നുണ്ടേൽ പറയെടോ ”
റോസമ്മ ഒടുക്കം ക്ഷമ നശിച്ചു എന്നെ നോക്കി കണ്ണുരുട്ടി .
“ഒകെ ഞാൻ പറഞ്ഞു തരാം റോസേ..”
പെട്ടെന്ന് മഞ്ജു ഇടയിൽ കേറി പറഞ്ഞു അവളുടെ അടുത്തേക്ക് ചേർന്നിരുന്നു .
“എന്ന പറ…ഞാൻ ഇതിൽ എങ്ങനെ കേറി വന്നു ?”
റോസമ്മ ഒന്നുമറിയാത്ത മട്ടിൽ ചോദിച്ചു .
“അതൊക്കെ ഉണ്ട് ..ഇവിടെ ഒരാൾക്ക് തന്നോട് ഭയങ്കര പ്രേമം ആയിരുന്നു എന്ന് റോസമ്മക്ക് അറിയോ ?”
മഞ്ജുസ് എന്നെ നോക്കി കണ്ണിറുക്കി റോസ്‌മേരിയോട് തിരക്കി .
ആ ചോദ്യം കേട്ടതും റോസമ്മ ഒന്ന് ഞെട്ടിയോ എന്നെനിക് സംശയം തോന്നാതിരുന്നില്ല . റോസ്‌മേരി വിശ്വാസം വരാതെ എന്നെ മിഴിച്ചൊന്നു നോക്കി . ഞാൻ അതിനു ഉത്തരമായി അവളെ നോക്കി പുഞ്ചിരിക്കുക മാത്രം ചെയ്തു .
“അതേടോ , എന്റെ കവിക്ക് തന്നെ വല്യ ഇഷ്ടായിരുന്നു എന്നൊക്കെ അവൻ എന്നോട് പറഞ്ഞിട്ടുണ്ട് . എന്നെ കണ്ടില്ലായിരുന്നേൽ റോസമ്മയെ എങ്ങനേലും കെട്ടിയേനെ എന്നൊക്കെ ഇടയ്ക്കു എന്നെ ദേഷ്യം പിടിപ്പിക്കാൻ വേണ്ടി പറയുവേം ചെയ്യും…”
മഞ്ജുസ് ഒരു തമാശ പറയുന്ന ലാഘവത്തിൽ എല്ലാം പറഞ്ഞു നിർത്തി .
പക്ഷെ റോസമ്മയിൽ അതത്ര തമാശ ഫീൽ ചെയ്യിച്ചതായി എനിക്ക് തോന്നിയില്ല. അവളുടെ നോട്ടത്തിലും ഭാവത്തിലുമൊക്കെ ഒരു വിശ്വാസക്കുറവ് ഉണ്ടായിരുന്നു . അതോ ഇനി അവൾക്കും എന്നോട് വല്ല ….
എന്റെ ചിന്തകൾ ആ സമയം അങ്ങനെയാണ് കടന്നു പോയത് . രണ്ടുപേരും പറയാതിരുന്ന ഒരു പ്രണയമാണോ എന്റെയും റോസമ്മയുടെയും ? അവളുടെ കൈവിരലുകൾ പിണച്ചുള്ള ഇരുത്തവും എന്നെ തുറിച്ചു നോക്കിയുള്ള നോട്ടവും ഒകെ കണ്ടപ്പോ എനിക്കങ്ങനെയാണ് തോന്നിയത് !
“അതേടോ റോസമ്മോ . ഇപ്പൊ ഇനി ധൈര്യം ആയിട്ടു പറയാലോ ,തന്റെം എന്റേം കെട്ടൊക്കെ കഴിഞ്ഞില്ലേ ”
ഞാൻ ചെറിയ ചിരിയോടെ പറഞ്ഞു .
“മ്മ്….”
റോസമ്മ ഒന്ന് പയ്യെ മൂളി . പക്ഷെ ആ മൂളലിനൊരു ബലക്കുറവുണ്ട്! അവളെന്നെ ഒരു നിർവികാരതയോടെ നോക്കി. വന്നപ്പോഴുള്ള ആവേശമൊന്നും ആ സമയം അവളിൽ കാണാൻ കഴിഞ്ഞില്ല .
“ഇതിലിപ്പോ ഞാൻ എന്ത് ചെയ്‌തെന്ന നിങ്ങളീ പറയണേ ?”
അത്രേം കേട്ടിട്ടും ഒന്നും മനസിലാകാത്ത പോലെ റോസമ്മ എന്നെ നോക്കി .
