‘ഓ.. ഇതൊരു തമാശ അല്ലേ.. എത്ര വരെ പോകാൻ പറ്റുമെന്ന് നോക്കാൻ വേണ്ടി.. നീ ഇല്ലായിരുന്നു എങ്കിൽ ഞാൻ നൂറിനു മുന്നേ നിർത്തിയേനെ..’
ഞാൻ അവനോട് പറഞ്ഞു
പുഷ്- അപ്പ് ചെയ്ത ക്ഷീണത്തിൽ അവിടെ ദീർഘനിശ്വാസം വിട്ട് താഴെ ഇരുന്നപ്പോൾ ആണ് പദ്മ അവിടെ ഉണ്ടായിരുന്ന കാര്യം ഞാൻ ശ്രദ്ധിച്ചത്. അവൾ എന്നെ നോക്കി അഭിനന്ദനങ്ങൾ അറിയിക്കുന്നു എന്ന മട്ടിൽ ഒന്ന് പുഞ്ചിരിച്ചു. അണച്ചു കൊണ്ട് ഇരുന്ന ഞാനും അവൾക്ക് തിരിച്ചൊരു ചിരി കൊടുത്തു. അവളിവിടെ ആദ്യമായ് ഒരാളെ നോക്കി ചിരിക്കുന്നത് എന്നെ ആണോ എന്ന് എനിക്ക് തോന്നി.. ഇത് നടക്കുന്നത് അവരുടെ അച്ഛന്റെയും അമ്മയുടെയും വെഡിങ്ങ് ആനിവേഴ്സറിയുടെ തലേന്നാണ്…!
വെഡിങ്ങ് ആനിവേഴ്സറിയുടെ ഫങ്ക്ഷന് ഞാൻ വൈകിട്ട് കൃഷ്ണയുടെ വീട്ടിൽ പോയി. വീട് മൊത്തം അലങ്കാരങ്ങളും വെളിച്ചവും കൊണ്ട് വർണശബളാഭമായിരുന്നു. അവരുടെ വിശാലമായ മുറ്റത്ത് പടുകൂറ്റൻ പന്തലൊക്കെ ഇട്ടിരുന്നു. കൃഷ്ണ തന്ന കാർഡ് കയ്യിലുള്ളത് കൊണ്ട് ഞാൻ അകത്തു കയറി. അവിടെ ഒക്കെ നല്ല തിരക്കായിരുന്നു. നഗരത്തിലെ പല പ്രമുഖരും അവിടെ ഉണ്ടായിരുന്നു. കുറച്ചു യുവനടന്മാരും നടികളും ഒക്കെ ആ കൂട്ടത്തിൽ ഉണ്ടായിരുന്നു. അതൊക്കെ പദ്മയുടെ സുഹൃത്തുക്കൾ ആകും. അവിടെ വേറാരെയും പരിചയവും കമ്പിനിയും ഇല്ലാതെ ഞാൻ ഒരു മൂലയ്ക്ക് ഒതുങ്ങി നിന്നു. ഞാൻ കല്യണ ഫങ്ക്ഷൻസ് ഒക്കെ ഇഷ്ടപെടാത്ത ഒരു കാര്യം ഇതാണ്. ഒറ്റയ്ക്ക് പോയാൽ നമ്മൾ പോസ്റ്റ്‌ ആകും. നല്ല ഒന്നാന്തരം പോസ്റ്റ്‌. അത് കൊണ്ടാണ് മുമ്പ് ഇഷാനി അവളുടെ ചേച്ചിയുടെ കല്യാണം വിളിച്ചപ്പോൾ പോലും പോകണോ വേണ്ടയോ എന്നൊരു സംശയം എന്റെ മനസ്സിൽ ഉണ്ടായിരുന്നത്. ഇവിടെ ആണേൽ എനിക്ക് കമ്പിനിക്ക് പറ്റിയ ആരെയും കാണുന്നുമില്ല
‘നീ വന്നിട്ട് എന്താ എന്നെ വിളിക്കാതെ ഇവിടെ മാറി നിൽക്കുന്നെ..?
ഒരു മൂലയ്ക്ക് ഒതുങ്ങി നിന്ന എന്നെ കൃഷ്ണ എങ്ങനെയോ കണ്ടു പിടിച്ചിരുന്നു.
‘ഞാൻ നീ ബിസി ആയിരിക്കും എന്ന് കരുതി വിളിക്കാതെ ഇരുന്നതാണ്..’
‘കൊള്ളാം നീ നല്ല പാർട്ടി ആണ്.. വല്ലതും കഴിച്ചോ എന്നിട്ട്..?
