: അത് കൊള്ളാലോ… ഞാൻ അമ്മയോട് ചോദിക്കട്ടെ…
_______/________/_______/_______
ഷിൽനയും തുഷാരയും ശനിയാഴ്ച ഡ്യൂട്ടി കഴിഞ്ഞ് നാട്ടിലേക്ക് വന്നു. തുഷാരയുടെ വീട്ടിലാണ് താമസം. തുഷാരയുടെ അമ്മയ്ക്ക് ഷിൽനയെ നേരിട്ട് കണ്ടിട്ടില്ലെങ്കിലും ഫോണിലൂടെ സംസാരിച്ച് നല്ല പരിചയം ഉണ്ട്. ഷിൽനയെ ഇഷ്ടപ്പെടാൻ അധികം സമയം ഒന്നും വേണ്ട. അവളോട് സംസാരിച്ചു ഇരുന്നാൽ തന്നെ അവളെ ഇഷ്ടപ്പെട്ടുപോകും. അതുകൊണ്ട് തുഷാരയുടെ വീട്ടുകാർക്ക് എല്ലാം ഷിൽനയെ നന്നായി ഇഷ്ടപ്പെട്ടു. ഒറ്റ ദിവസം കൊണ്ട് അവരെ എല്ലാം കയ്യിൽ എടുത്തു എന്റെ ഷിക്കുട്ടി. തുഷാരയുടെ അനിയൻ ഹോസ്റ്റലിൽ നിന്ന് പഠിക്കുന്നത് കൊണ്ട് വീട്ടിൽ അമ്മയും അമ്മൂമ്മയും മാത്രമേ ഉണ്ടാവാറുള്ളൂ. പെണ്ണുകാണൽ പ്രമാണിച്ച് അനിയനും വന്നിട്ടുണ്ട് വീട്ടിൽ.
…………….
കാലത്ത് ഒരു 9 മണിയോട് കൂടി ഞങ്ങൾ വീട്ടിൽ നിന്നും പുറപ്പെട്ടു. കൂട്ടുകാരന്റെ റോളിൽ വിഷ്ണുവും വേറെ രണ്ടു ചേട്ടന്മാരും ഉണ്ട്. അങ്ങനെ ഞങ്ങൾ നാലുപേരും ഏകദേശം 1 മണിക്കൂർ യാത്ര ചെയ്ത് തുഷാരയുടെ വീട്ടിൽ എത്തി. നല്ല ചുറ്റുപാട്. പാടത്തിന് നടുവിലൂടെയുള്ള വഴിയിൽ നിന്നും ഇടത്തോട്ട് തെറ്റിയാൽ കാണുന്ന ആദ്യത്തെ വീടാണ് തുഷാരയുടേത്. വീടിന്റെ ഉമ്മറത്ത് ഇരുന്നാൽ നല്ല കാഴ്ച ആസ്വദിക്കാം. വയലും തോടും ഒക്കെയുള്ള ഗ്രാമീണ ഭംഗി തുളുമ്പുന്ന അന്തരീക്ഷം. വൃത്തിയായി പണിതിട്ടുള്ള അധികം വലിപ്പമില്ലാത്ത ഒതുങ്ങിയ ഇരുനില വീട്. ഈ അടുത്ത് പണിതത് ആയിരിക്കാൻ ആണ് സാധ്യത. നല്ല മോഡലിൽ ചരിച്ച് വാർത്തിരിക്കുന്നതിനാൽ കാണാൻ നല്ല ഭംഗിയുണ്ട്. ഏകദേശം ഒരു 2300 sq. ft എങ്കിലും ഉണ്ടാവും മൊത്തത്തിൽ. വീട് കണ്ടപ്പോൾ തന്നെ എന്റെ ഉള്ളിലെ സിവിൽ എഞ്ചിനീർ ഉണർന്നു എന്ന് വേണം പറയാൻ.
പൂച്ചട്ടികൾ അതിരിടുന്ന മുറ്റത്തേക്ക് ഞങ്ങളുടെ കാർ ചെന്ന് നിന്നു. തുഷാരയുടെ അനിയൻ ആണെന്ന് തോന്നുന്നു ഞങ്ങളെ വരവേൽക്കാനായി മുറ്റത്ത് ഇറങ്ങി നില്പുണ്ട്. കാണാൻ നല്ല ഭംഗിയുള്ള പയ്യൻ. സൗമ്യമായ മുഖത്ത് ഒരു പുഞ്ചിരിയുമായി അവൻ ഞങ്ങളെ അകത്തേക്ക് ക്ഷണിച്ച് ഇരുത്തി. അമ്മൂമ്മയും തുഷാരയുടെ അമ്മ ലതയും ചേർന്ന് ഞങ്ങളോട് ഓരോന്ന് ചോദിച്ചു മനസിലാക്കി. ലാലു എന്ന് വീട്ടിൽ വിളിക്കുന്ന ശ്രീലാൽ അതായത് തുഷാരയുടെ അനിയൻ അകത്തേക്ക് കയറി ചെന്നു. ഞങ്ങൾ വന്നതറിഞ്ഞിട്ടും ഷിൽന എന്താണ് പുറത്തേക്ക് വരാത്തത് എന്ന് ആലോചിച്ചു ഇരിക്കുകയായിരുന്നു ഞാൻ.
_______/________/_______/_______
അടുക്കളയിൽ ഷിൽനയും തുഷാരയും തമ്മിൽ പതിഞ്ഞ സ്വരത്തിൽ സംസാരിക്കുകയാണ്.
: ചെറുക്കനും ടീമും വന്നതോടെ പെണ്ണിന്റെ മുഖത്ത് ചെറിയ നാണം ഒക്കെ വന്നല്ലോ…
: ഒന്ന് പോ ഏച്ചി…. എനിക്ക് കാണണമെന്ന്‌ ഒട്ടും ആഗ്രഹമില്ല….
: നീ തൽക്കാലം അവർക്ക് ഓരോ ചായ കൊണ്ടു കൊടുക്ക്…
ചെക്കനെ ഒന്ന് നോക്കിക്കോ… ചുള്ളൻ ആണെങ്കിലോ..
: എനിക്ക് അത്ര വലിയ ചുള്ളൻ ഒന്നും വേണ്ട…
ഒരു കാര്യം ചെയ്യുന്നോ… ഏച്ചി പോയി നോക്കുന്നോ എനിക്ക് പകരം..
: ഞാൻ ബുക്ഡ് ആണ് മോളേ…
………………..
തുഷാരയുടെ അമ്മ ലതേച്ചി അടുക്കളയിലേക്ക് ചെന്ന് തുഷാരയുടെ കൈയ്യിൽ ചായ ട്രേയുമായി ഞങ്ങളുടെ അടുത്തേക്ക് പറഞ്ഞുവിട്ടു. മുന്നിൽ നടന്നു വരുന്ന തുഷാരയുടെ പുറകിൽ നിന്നും ഷി എന്നെ നോക്കി കൈ ഉയർത്തി
