അവളുടെ പുറത്തു പയ്യെ തട്ടികൊണ്ട് അച്ഛൻ തിരക്കി .
“പിന്നെ…പെരുത്ത് സുഖം …”
മഞ്ജുസ് പാതി കളിയായും കാര്യമായും പറഞ്ഞു ചിരിച്ചു . പിന്നെ ആദികുട്ടനെ അച്ഛനെ ഏൽപ്പിച്ചു .
“ദേ ഡാ അപ്പൂസേ നിന്റെ മുത്തശ്ശൻ …”
അച്ഛനെ ചൂണ്ടി കൊണ്ട് മഞ്ജു ചിണുങ്ങി .
“അതൊക്കെ അവനു ഓര്മ ഉണ്ട് ..അല്ലേടാ മോനെ …”
ആദിയുടെ കവിളിൽ പയ്യെ നുള്ളികൊണ്ട് മഞ്ജുസിന്റെ അച്ഛൻ പറഞ്ഞു .
പ്രസവ ശേഷം മൂന്നു മാസത്തോളം പിള്ളേരും മഞ്ജുവും സ്വന്തം വീട്ടിൽ ആയിരുന്നു .അതുകൊണ്ട് തന്നെ അച്ഛനും അമ്മക്കുമൊക്കെ പിള്ളേരെന്നു വെച്ചാൽ ജീവൻ ആണ് .ആ സമയത്തു പിള്ളേരുടെ കാര്യമൊക്കെ നോക്കിയതും, അവരെ കുളിപ്പിച്ചിരുന്നതും ഒരുക്കിയതുമൊക്കെ മഞ്ജുവിന്റെ അമ്മയായിരുന്നു .
“നിങ്ങളിങ്ങനെ അവിടെ നിന്ന് സംസാരിക്കാതെ അകത്തോട്ട് കേറിവാ പിള്ളേരെ …”
മുറ്റത്തു നിന്ന് സർകീട്ടു നടത്തുന്ന ഞങ്ങളെ നോക്കി ഉമ്മറത്തെ ചാരുകസേരയിൽ ഇരുന്ന മുത്തശ്ശി സ്വല്പം ഉറക്കെ പറഞ്ഞു . അപ്പോഴാണ് കളിചിരിയിൽ മുഴുകിയ ഞങ്ങൾ എല്ലാവരും അങ്ങോട്ട് ശ്രദ്ധിക്കുന്നത് .
“ശരിയാ….കേറി ഇരിക്ക് മോനെ …”
എന്നെ നോക്കി ചിരിച്ചുകൊണ്ട് മഞ്ജുസിന്റെ അച്ഛൻ ചിരിച്ചു . അതോടെ എല്ലാവരും കൂടി പൂമുഖത്തേക്ക് കയറി . കുറച്ചു നാളുകൾക്കു ശേഷം അവിടേക്കെത്തിയതിന്റെ അമ്പരപ്പിൽ റോസ് മോളും ആദിയും ചുറ്റും കണ്ണോടിക്കുന്നുണ്ട് .
“സുഖല്ലേ മുത്തശ്ശി…”
ചാര് കസേരയിൽ ഇരുന്ന മുത്തശ്ശിയുടെ കൈപിടിച്ചുകൊണ്ട് ഞാൻ പയ്യെ തിരക്കി . പിന്നെ അവരുടെ അടുത്തായി തിണ്ണയിൽ ഇരുന്നു .
“അങ്ങനെ പോണൂ കുട്ടിയേ….വയസായില്യേ ..”
മുത്തശ്ശി അതിനു ചിരിയോടെ ഒരു മറുപടി നൽകി . ഞാനതിനു ചിരിയോടെ ഒന്ന് മൂളിക്കൊടുത്തു .
“അമ്മമ്മേനെ മറന്നോടീ ചുന്ദരി …?”
റോസിമോളെ നോക്കി ചിണുങ്ങിക്കൊണ്ട് മഞ്ജുവിന്റെ അമ്മ തിരക്കി . അതിനു മറുപടി ആയി റോസിമോള് അവരുടെ മുഖത്തൊക്കെ ഇടം കൈത്തലം കൊണ്ട് പയ്യെ അടിച്ചുകൊണ്ട് ചിണുങ്ങി .
“മമ്മ ..മാ ..”
റോസ് മോള് ചിരിച്ചുകൊണ്ട് അവരുടെ കവിളിൽ ഉമ്മവെച്ചു . മഞ്ജുസും അവളുടെ അച്ഛനും അതൊക്കെ കൗതുകത്തോടെ നോക്കുന്നുണ്ട് .
“ന്റെ മുത്തശ്ശി എന്താ കുന്തം വിഴുങ്ങിയ പോലെ ഇരിക്കണേ..”
