“ചാ ച്ചാ…”
കളിപ്പാട്ടം നിലത്തേക്കിട്ടു പെണ്ണ് എന്നെ നോക്കി ചിരിച്ചു . പിന്നെ കീ കൊടുത്ത പോലെ തറയിലൂടെ മുട്ടിലിഴഞ്ഞു ഞങ്ങളുടെ നേരെ വേഗത്തിൽ വന്നു . മഞ്ജുസിന്റെ അച്ഛനും മുത്തശ്ശിയുമൊക്കെ അത് ചെറു ചിരിയോടെ നോക്കുന്നുണ്ട് .
“പതുക്കെ പതുക്കെ …”
ഞാൻ പെണ്ണിന്റെ സ്പീഡ് കണ്ടു എരിവ് വലിച്ചു . പിന്നെ അവളുടെ അടുത്തേക്ക് ഓടി ചെന്ന് പെണ്ണിനെ തറയിൽ നിന്നും എടുത്തു ഉയർത്തി .
“വീഴുവെടി പെണ്ണെ ..എങ്ങോട്ടാ ഈ പായുന്നെ ”
ഞാൻ അവളുടെ കവിളിൽ ഉമ്മവെച്ചുകൊണ്ട് ചിരിച്ചു .
“ച്ചാ ച്ചാ ..ഹ്മ്മ്..മ്മം മ്മം ..”
അവൾ തിരിച്ചും ചിണുങ്ങിക്കൊണ്ട് എന്റെ കവിളിൽ ഉമ്മവെച്ചു എന്റെ മുഖത്ത് ഇടം കൈകൊണ്ട് അടിച്ചു .
“‘അമ്മ പോയി വന്നില്ലേ അച്ഛാ ?”
വിളക്ക് വെക്കാനായി പോയ അമ്മയെ കാണാത്തതുകൊണ്ട് മഞ്ജുസ് എന്റെ അടുത്തേക്ക് നീങ്ങികൊണ്ട് തിരക്കി .
“ഇല്ലെടി..ഇപ്പൊ വരും..”
അവളുടെ അച്ഛൻ അതിനു ഗൗരവത്തിൽ മറുപടി നൽകി .
“ആഹ് …ഇവനെന്താ ഈ നോക്കുന്നെ ? ചെക്കന് മൊബൈൽ കണ്ടാൽ പിന്നെ ആരേം വേണ്ട ”
പുള്ളിയുടെ മടിയിലിരിക്കുന്ന ആദിയെ ഉദ്ദേശിച്ചുകൊണ്ട് മഞ്ജുസ് പറഞ്ഞു . അതിനു പുള്ളിക്കാരൻ ഒന്ന് ചിരിക്കുക മാത്രം ചെയ്തു .
“മുത്തശ്ശി എന്താ മിണ്ടാണ്ടെ ഇരിക്കണേ ? ഇപ്പൊ ഭാഗവതം വായിക്കലൊന്നും ഇല്ലേ ?’
മഞ്ജുസ് അവരെ കളിയാക്കി മുത്തശ്ശിയുടെ അടുത്തേക്ക് നീങ്ങി .
“എല്ലാം ഉണ്ടെടി പെണ്ണെ ..”
മുത്തശ്ശി അതിനു ചിരിയോടെ മറുപടി നൽകി .
“എന്ന പിന്നെ എടുത്തുവെച്ചു വായിക്കെന്നെ ..”
മഞ്ജുസ് ചിരിച്ചുകൊണ്ട് കുനിഞ്ഞു അവരുടെ കഴുത്തിൽ കൈചുറ്റി .
“അതൊക്കെ ഞാൻ വായിച്ചോളാം ..നീ ആദ്യം പോയി മേക്കഴുകി കാവിൽ പോയി തൊഴുതേ ”
മുത്തശ്ശി ഒരുപദേശം പോലെ പറഞ്ഞു .
“ഇപ്പഴോ ?”
മഞ്ജുസ് മടിയോടെ ചിണുങ്ങി .
“ഇപ്പഴാല്ലാണ്ടെ പിന്നെ എപ്പഴാ ? വേഗം ചെല്ല്..ഒക്കെ അവനവന്റെ ആണെന്ന് ഓര്മ വേണം ”
