“ആരാ മോളെ അത് ?”
ഹാളിൽ നിന്നും ഉമ്മറത്തേക്ക് കടക്കുമ്പോൾ തന്നെ ഹേമാന്റി ചോദിച്ചു .
മായേച്ചിയും അതുകേട്ട് ഒന്ന് പരുങ്ങി .
“ഓഹ്..നശിപ്പിച്ചു…”
ഹേമാന്റി എല്ലാം കണ്ടെന്നു മനസിലായതയോടെ വിവേകിനെ നോക്കി മായേച്ചി പല്ലിറുമ്മി .പക്ഷെ വിവേകേട്ടനു പരുങ്ങലോ ഭാവ വ്യത്യസ്തമോ ഒന്നും ഉണ്ടായില്ല.
ഉമ്മറത്തേക്കെത്തിയതോടെ ഹേമാന്റിക്കും ആളെ പിടികിട്ടി .
“അല്ല…ഇത് വിവേക് അല്ലെ ? നീയെന്താ മോനെ ഈ വഴിക്കൊക്കെ ? നിന്റെ അമ്മായി [അതായത് എന്റെ അമ്മ] പറഞ്ഞു നീ വന്നിട്ടുണ്ടെന്നൊക്കെ .വാടാ കേറിയിരിക്ക് ”
വിവേകേട്ടനെ അറിയാവുന്നതുകൊണ്ട് തന്നെ ഹേമാന്റി പുഞ്ചിരിയോടെ വിശേഷങ്ങൾ തിരക്കിക്കൊണ്ട് അകത്തേക്ക് ക്ഷണിച്ചു .
ഹേമാന്റിയുടെ വീട് എന്റെ അമ്മയുടെ തറവാട്ടിന് അടുത്തായിരുന്നു . ചെറുപ്പം തൊട്ടേ ഹേമാന്റിയുമായി എന്റെ അമ്മയും അടുത്ത കൂട്ടാണ് . കൃഷ്ണൻ മാമയെയും മുത്തശ്ശിയെയുമൊക്കെ ബന്ധുക്കളെയെന്ന പോലെ ഹേമാന്റിക്കും സുപരിചിതമാണ് ! പ്രണയ വിവാഹത്തോടെ ഹേമാന്റി ഒളിച്ചോടി ഇപ്പോഴുള്ള വീട്ടിലേക്കെത്തി , അതിൽ പിന്നെ സ്വന്തം വീട്ടുകാരോടൊക്കെ ഉടക്കാണ്! എന്തോ ഭാഗ്യത്തിന് എന്റെ അമ്മയെയും അതിനടുത്തേക്കാണ് കുറച്ചു വർഷങ്ങൾ കഴിഞ്ഞു കെട്ടിക്കൊണ്ടു വന്നത് . അതോടെ പഴയ കൂട്ടുകാർ വീണ്ടും ജോയിന്റ് ആയി ! മായേച്ചി ജനിക്കുന്ന സമയത്താണ് എന്റെ അമ്മയെ കെട്ടിക്കൊണ്ടു വരുന്നത് , അത് കഴിഞ്ഞു കുറച്ചു വർഷങ്ങൾ കഴിഞ്ഞാണ് ഞാൻ ഉണ്ടാകുന്നതും [എന്റെ അമ്മക്ക് കുറച്ചു താമസിച്ചാണ് വിശേഷം ഉണ്ടായത് ] ! അതുവരെ മായേച്ചിയെ സ്വന്തം മകളെ പോലെ നോക്കിയ ആളാണ് എന്റമ്മ ! പക്ഷെ ഹേമന്റിയുടെ ഭർത്താവു ആള് നേരത്തെ പോയി ! ഒരു ആക്സിഡന്റിൽ …അതോടെ ഹേമാന്റി കഷ്ടപ്പെട്ടാണ് രണ്ടു മക്കളെയും വളർത്തി , പഠിപ്പിച്ചു ഒരു നിലയിലാക്കിയത് !
മായേച്ചി അതോടെ സ്വല്പം ദേഷ്യത്തിൽ വിവേകിനെ നോക്കി .
“ഹേമ ചേച്ചി ഇപ്പൊ അങ്ങോട്ടൊന്നും വരാറില്ലല്ലേ ?”
വിവേകേട്ടൻ പരിചയം പുതുക്കുന്ന പോലെ ചോദിച്ചു ഉമ്മറത്തേക്ക് കയറി .
“ഏയ് ..ഇല്ല…അവിടെ ഉള്ളോർക്കൊന്നും ഇപ്പൊഴും നമ്മളെ പിടിക്കില്ല ”
തെല്ലൊരു വിഷമത്തോടെ ഹേമാന്റി പറഞ്ഞു .
“ഡീ..നീയെന്താ അവിടെ നിക്കണേ …കേറി വാ…”
എല്ലാം നോക്കി മുറ്റത്തു നിന്ന് നഖം കടിക്കുന്ന മായേച്ചിയെ നോക്കി ഹേമാന്റി പറഞ്ഞു .
“അല്ലാ..ഇവളെ ആയിട്ട് നിനക്കെങ്ങാനാ പരിചയം ? നിങ്ങളങ്ങനെ കാണാൻ ഒന്നും വഴിയില്ലല്ലോ ?”
പെട്ടെന്ന് എന്തോ ഓർത്ത പോലെ ഹേമാന്റി വിവേകിനെ നോക്കി .
“പരിചയമൊക്കെ ഉണ്ട് ചേച്ചി..ഞങ്ങള് കണ്ണന്റെ അവിടെ വെച്ചു പരിചയപ്പെട്ടിട്ടുണ്ട് . പിന്നെ ഇടക്കൊക്കെ അതിനു മുൻപും കണ്ടിട്ട് ഉണ്ട് ”
വിവേകേട്ടൻ മായേച്ചിയെ നോക്കി ചിരിയോടെ പറഞ്ഞു .
“ആഹ്. എന്തായാലും വന്നതല്ലേ മോൻ ചായ കുടിക്ക്..ഞാൻ ഇതിവൾക്ക് കൊണ്ട് വന്നതാ. അവളിനി വേറെ കഴിച്ചോളും ”
ഒറ്റ നിമിഷം കൊണ്ട് ഹേമാന്റി പ്ളേറ്റ് മറിച്ചു , കൊണ്ട് വന്ന ചായയും പലഹാരവും വിവേകേട്ടന്റെ മുൻപിലേക്ക് എടുത്തുവെച്ചു .
