“ഞാൻ ഒരു കാര്യം ചോദിച്ചാൽ മഞ്ജുസ് സത്യം പറയോ ?”
അവളെ കെട്ടിപിടിച്ചുകൊണ്ട് ഞാൻ പതിയെ ചോദിച്ചു .”എന്താടാ ?”
അവളും അതെ രീതിയിൽ തിരക്കി .

“അതൊക്കെ ഉണ്ട് …നീ ചൂടാവില്ലെങ്കിൽ ഞാൻ പറയാം ”
അവളുടെ ടി-ഷർട്ടിന്റെ പുറത്തുകൂടി തഴുകികൊണ്ട് ഞാൻ കുറുകി .

“എന്ന പറയണ്ട..ഞാൻ ചിലപ്പോൾ ചൂടാവും .എന്തേലും കൊനഷ്ട് കാര്യം ആകുമെന്നുറപ്പാ ”
എന്റെ സ്വഭാവം ഓർത്തെന്നോണം മഞ്ജുസ് ചിരിച്ചു .

“ആഹ്..അങ്ങനെ എങ്കിൽ അങ്ങനെ..എന്ന ഞാൻ ചോദിച്ചോട്ടെ ?”
മഞ്ജുസിന്റെ പുറത്തു തഴുകികൊണ്ട് തന്നെ ഞാൻ തിരക്കി.

“ഹ്മ്മ് ..ചോദിക്ക് ..”
മഞ്ജുസ് പയ്യെ മൂളി .

“എന്നോട് ദേഷ്യം തോന്നില്ലല്ലോ ? ”
ഞാൻ ഒന്നുടെ മുഖവുരയിട്ടു .

“ആദ്യം നീ പറ..ദേഷ്യമൊക്കെ പിന്നല്ലേ..”
മഞ്ജുസ് പയ്യെ ചിരിച്ചു .

“ഹ്മ്മ് …ആ ആക്സിഡന്റിനു ശേഷം മഞ്ജുസ് എന്നെ കൂടുതൽ സ്നേഹിക്കുന്നതായി അഭിനയിക്കുന്നുണ്ടോ ? എനിക്ക് അങ്ങനെ ഒരു തോന്നൽ ഇല്ലാതില്ല .”
ഞാൻ പറഞ്ഞു നിർത്തിയതും അവളെന്റെ നെഞ്ചിൽ നിന്നും മുഖം ഒന്നുയർത്തി എന്നെ തുറിച്ചു നോക്കി .

“ഉണ്ടോ ?”
ഞാനവളെ നോക്കി പുരികങ്ങൾ ഉയർത്തി ചിരിച്ചു .

“കവി ഞാൻ നിന്റെ മോന്ത അടിച്ചു പൊട്ടിക്കുന്ന വരെ ഉണ്ടാകും …”
ഞാൻ പറഞ്ഞു നിർത്തിയതും മഞ്ജുസ് എന്നെ നോക്കി പല്ലിറുമ്മിക്കൊണ്ട് ശബ്ദം ഉയർത്തി .

“ഹി ഹി..”
അവളുടെ മറുപടി കേട്ട് ഞാൻ പയ്യെ ചിരിച്ചു .

പക്ഷെ അതുകൊണ്ടൊന്നും മഞ്ജുസിന്റെ ദേഷ്യം മാറിയില്ല. ഒറ്റനിമിഷം കൊണ്ട് അവളുടെ മുഖത്തെ തെളിച്ചമൊക്കെ എങ്ങോട്ടോ മാഞ്ഞു . എന്നോടുള്ള നീരസം ആ കണ്ണുകളിൽ ചെറിയ നനവായി ഉരുണ്ടുകൂടി .

“ഉള്ളില് ഇങ്ങനെ ഒരു സംശയം വെച്ചിട്ടാണ് നീ കൂടെ നടന്നതെന്ന് ഞാൻ അറിഞ്ഞില്ല ..മതി ..ഇനി എന്നെ വിട്ടേ..”
മഞ്ജുസ് എന്റെ കൈകള്ക്കുള്ളിൽ കിടന്നു കുതറികൊണ്ട് പല്ലിറുമ്മി .

“പിന്നെ പിന്നെ ..നീയങ്ങു പറഞ്ഞാൽ ഞാൻ വിടാൻ നിക്കുവല്ലേ ”
ആ മറുപടി അത്ര കാര്യമാക്കാതെ ഞാൻ ചിരിച്ചു .

“എന്തിനാ കവി ഇങ്ങനെ ഒകെ പറയണേ ..ദിസ് ഈസ് ടൂമച്ച് ”
മഞ്ജുസ് എന്റെ നെഞ്ചിലേക്ക് മുഖം പൂഴ്ത്തികൊണ്ട് ചിണുങ്ങി .