ഞാൻ മഞ്ജുസിനെ ചോദ്യ ഭാവത്തിൽ നോക്കി .”പറയാതെ പോണത് മോശം അല്ലെ ..നീ വിളിക്കെടാ ..”
മഞ്ജുസ് എന്ന് പ്രോത്സാഹിപ്പിച്ചു . അതോടെ അവളെ പുറത്തു നിർത്തി ഞാൻ റൂമിലേക്ക് കടന്നു . പിന്നെ അച്ഛന്റെ അടുത്ത് ബെഡിൽ ചെന്നിരുന്നു ധൈര്യം സംഭരിച്ചു പയ്യെ വിളിച്ചു .
“അച്ഛാ …അച്ഛാ….”
ഞാൻ ഒന്ന് രണ്ടു വട്ടം വിളിച്ചതും പുള്ളി കണ്ണ് തുറന്നു . എന്നെ മുൻപിൽ കണ്ടതും പുള്ളി ചുറ്റുമൊന്നു നോക്കി . കിടന്ന സ്ഥലം മാറിപ്പോയോ എന്ന് തോന്നിയോ എന്തോ .
“ഞാൻ പോവാട്ടോ …”
അച്ഛൻ എന്തേലും ഇങ്ങോട്ട് പറയുന്നതിന് മുൻപേ ഞാൻ കാര്യം അങ്ങോട്ട് പറഞ്ഞു . അതോടെ പുള്ളി തലയാട്ടികൊണ്ട് എഴുനേറ്റു . ഒരു ലുങ്കി മുണ്ട് മാത്രമാണ് കക്ഷിയുടെ വേഷം . അത് ഒന്നുടെ വാരി ചുറ്റികൊണ്ട് കക്ഷി എന്നെ നോക്കി .
“ഇറങ്ങുവാണോ?”
പുള്ളി എന്നെ ഗൗരവത്തിൽ നോക്കി .
“ആഹ്..അതെ ..”
ഞാൻ അതിനു പയ്യെ മറുപടി നൽകി .
“ഹ്മ്മ്..എന്ന നടക്ക്”
പുള്ളി ഗൗരവത്തിൽ പറഞ്ഞു ബെഡിൽ നിന്നും താഴേക്കിറങ്ങി . പിന്നാലെ ഞാനും . അതോടെ വാതിൽക്കൽ നിന്ന മഞ്ജുസ് ഒന്നുമറിഞ്ഞില്ലെന്ന മട്ടിൽ ഹാളിലേക്ക് ഓടി .ഞാനും അച്ഛനും കൂടി ഹാളിലോട്ട് എത്തിയതോടെ മഞ്ജുസ് ഞങ്ങളെ നോക്കി പുഞ്ചിരിച്ചു . പിന്നെ അവളും അച്ഛനും കൂടി ഉമ്മറത്തു വന്നു നിന്ന് എന്നെ യാത്രയാക്കി . സ്വല്പം വിഷമം തോന്നിയെങ്കിലും പോകാതെ പറ്റില്ലല്ലോ .
അങ്ങനെ പത്തുമണി അടുപ്പിച്ചു ഞാൻ കോയമ്പത്തൂരിലെ സാമ്രാജ്യത്തിലെത്തി .ഞാൻ ചെല്ലുന്ന കാര്യം അറിയാവുന്നതുകൊണ്ട് ശ്യാം ഓഫീസിലേക്ക് പോകാതെ എന്നെയും കാത്തിരിക്കുന്നുണ്ടായിരുന്നു .
ഗസ്റ്റ് ഹൌസിന്റെ മുൻപിൽ കാർ നിർത്തിക്കൊണ്ട് ഞാൻ ഇറങ്ങി . ശ്യാം വീടിന്റെ ഉമ്മറത്തെ കസേരയിൽ അയൺ ചെയ്തു മിനുക്കിയ ഷർട്ടും ടൈയും ഒകെ കെട്ടി സെറ്റപ്പായി ഇരിക്കുന്നുണ്ട് . അവന്റെ ലൂക്കും കാര്യങ്ങളും കണ്ടാൽ ഞാൻ അവന്റെ അസ്സിസ്റ്റന്റും അവൻ എന്റെ മുതലാളിയും ആണെന്ന് തോന്നും .
