“പോടാ..വിശന്നപ്പോ സ്വല്പം കഴിച്ചതാ..”
അവളെന്റെ കളിയാക്കൽ കണ്ടു ജാള്യതയോടെ പറഞ്ഞു .
“അതിനെന്താ ഇത്ര നാണിക്കാൻ..നീ ഫുൾ കഴിച്ചോടി ”
ഞാൻ ചിരിയോടെ പറഞ്ഞു അവൾക്കടുത്തേക്കെത്തി .
പിന്നെ കഞ്ഞി പത്രം മേശപ്പുറത്തേക്ക് വെച്ചു. മഞ്ജുസ് അതിലേക്ക് കൗതുകത്തോടെ നോക്കുന്നുണ്ട്.
“മ്മ്..നീ ഇതൊക്കെ ഉണ്ടാക്കുമോ ?”
കഞ്ഞിയിൽ നിന്ന് ആവി ഉയരുന്നത് നോക്കി മഞ്ജുസ് അത്ഭുതത്തോടെ ചോദിച്ചു .
“ഇതൊക്കെ എന്ത്…പക്ഷെ നീ ഇതൊരു സൗകര്യമായി എടുക്കണ്ട ..”
അവളുടെ സ്വഭാവം ശരിക്കു അറിയാവുന്നതുകൊണ്ട് ഞാൻ ചിരിയോടെ പറഞ്ഞു .
“പോടാ അവിടന്ന് ..ഞാൻ സീരിയസ് ആയിട്ട് ചോദിച്ചതാ ..എനിക്ക് പോലും അറിയില്ല ഇതുണ്ടാക്കാൻ ”
മഞ്ജുസ് കള്ളച്ചിരിയോടെ പറഞ്ഞു .
“ഞാൻ അമ്മക്ക് ഫോൺ വിളിച്ചു..പുള്ളിക്കാരി പറഞ്ഞ പോലെ ഉണ്ടാക്കിയതാ ..എന്താകുമോ എന്തോ ”
ഞാൻ ചിരിയോടെ പറഞ്ഞു ഷർട്ടിന്റെ പോക്കെറ്റിൽ കയ്യിട്ടു . പിന്നെ പുറത്തു നിന്നും വാങ്ങിച്ച അച്ചാർ പാക്കെറ്റ് ചെറുതൊരെണ്ണം എടുത്തു ബെഡിലേക്കിട്ടു .
“ഇന്നാ..ഇതും കൂട്ടി കഞ്ഞി മുണുങ്ങിക്കൊ”
ഞാൻ തമാശ പോലെ പറഞ്ഞു അവളെ നോക്കി .
“അപ്പൊ ഞാൻ വിചാരിച്ച പോലെ അല്ല..കുറച്ചൊക്കെ സ്നേഹം ഉണ്ടല്ലേ ?”
മഞ്ജുസ് എന്റെ മട്ടും ഭാവവും നോക്കി ചിരിയോടെ പറഞ്ഞു .
“അതുകൊണ്ടൊന്നും അല്ല ..ഇവിടെ കിടന്നു വല്ലോം പറ്റിയാ ഞാൻ തന്നെ കൊണ്ട് മണ്ടേണ്ടി വരും .എന്തിനാ വെറുതെ റിസ്ക് എടുക്കുന്നെ എന്നുവെച്ചിട്ടാ ..”
ഞാൻ ആരോടെന്നില്ലാതെ പറഞ്ഞു അവൾക്കടുത്തേക്ക് നീങ്ങി . അത് കേട്ടതും അവൾക്ക് ദേഷ്യം വന്നു എന്റെ കയ്യിൽ നുള്ളി .
“ആഹ്…”
അവളുടെ നുള്ളലിന്റെ വേദനയിൽ ഞാൻ ഒന്ന് പിടഞ്ഞു . പിന്നെ ഒന്നും മിണ്ടാതെ ബെഡിലേക്കിരുന്നു അവളുടെ ഇരു കവിളും കൈകൾ കൊണ്ട് ചേർത്ത് പിടിച്ചു .
“സത്യം പറയാലോ മഞ്ജുസേ ഇന്നലെ രാത്രി നീ കിടന്നു വിറക്കുന്നത് കണ്ടപ്പോ ഞാൻ പേടിച്ചു പോയെടോ .ഇപ്പോഴാ ശരിക്കും ഒരാശ്വാസം കിട്ടിയത് ..”
അവളുടെ ഇരു കവിളും പയ്യെ തഴുകി ഞാൻ സാവധാനം പറഞ്ഞു .
