“കാപ്പിയും ചായേം ഒന്നും നടക്കുന്ന കാര്യം അല്ല ..മറ്റേതു നോക്കാം…”
ഞാൻ ഒറ്റ ശ്വാസത്തിൽ പറഞ്ഞു ഫോൺ വെച്ചു . പിന്നെ എന്റെ ഒരു പഴയ മുണ്ടിൽ നിന്നും ഒരു കഷ്ണം കീറിയെടുത്തു നനച്ചു ഞാൻ ബെഡിനടുത്തേക്കെത്തി.
മഞ്ജുസ് കണ്ണുംപൂട്ടി നല്ല ഉറക്കം ആണ് . ഞാൻ അവളുടെ പുതപ്പു താഴ്ത്തി മഞ്ജുസിനെ കുലുക്കി വിളിച്ചു .
“ഡോ ..കണ്ണ് തുറന്നെ ..’
ഞാൻ പയ്യെ പറഞ്ഞതും അവൾ പതിയെ കണ്മിഴിച്ചു . ആ സമയം നോക്കി തന്നെ ഞാനാ തുണി നിവർത്തി അവളുടെ നെറ്റിയിൽ പതിപ്പിച്ചു.
ആ നനവ് പൊടുന്നനെ നെറ്റിയിൽ പടർന്നതും അവളൊന്നു പുളഞ്ഞു .
“ശേ എന്താ കവി ഇത്..”
അവൾ ചിണുങ്ങിക്കൊണ്ട് അതെടുത്തു മാറ്റാനായി കൈപൊക്കി .
പെട്ടെന്ന് വെള്ളം നനഞ്ഞപ്പോൾ അവൾക്ക് ദേഷ്യമാണ് വന്നത് ! കൈകൊണ്ടു അതെടുത്തു മാറ്റാൻ മഞ്ജുസ് തുനിഞ്ഞതും ഞാൻ തടഞ്ഞു .
“ചുമ്മാ ഇരിയെടി ..അതവിടെ കിടന്നോട്ടെ..അമ്മ പറഞ്ഞിട്ടാ”
ഞാൻ അവളുടെ കൈത്തലം പിടിച്ചു പതിയെ പറഞ്ഞു .
“അമ്മയോ ? നീ ഈ നേരത്തെന്തിനാ അമ്മയെ ഒകെ വിളിച്ചത് ?”
മഞ്ജുസ് അടുത്ത് കിടന്ന മൊബൈൽ എടുത്തു സമയം നോക്കി എന്നോടായി ചോദിച്ചു .
“പിന്നെ ഞാൻ ഒറ്റക്ക് എന്ത് ചെയ്യാനാ ..എനിക്കിങ്ങനെ ഒകെ ആയാൽ പേടിയാ..”
ഞാൻ ചിരിയോടെ പറഞ്ഞു അവളുടെ നെറ്റിയിൽ അത് പതിച്ചു കൊടുത്തു . പിന്നെ കഴുത്തും കവിളും ഒകെ തൊട്ടു നോക്കി . മഞ്ജുസ് അതെല്ലാം ഒരു ചെറിയ വിറയലോടെ നോക്കുന്നുണ്ട് .
“ബാക്കിയുള്ളവരുടെ ഉറക്കം കളയാനായിട്ട് ..”
ഞാൻ അവളുടെ നോട്ടം കണ്ടു ആരോടെന്നില്ലാതെ പറഞ്ഞു ബെഡിൽ ഇരുന്നു . കുറച്ചു കഴിഞ്ഞതും മഞ്ജുസ് നല്ല ഉറക്കം ആയി . അതോടെ ഞാനും കുറച്ചു നേരം കിടന്നു ഉറങ്ങി .
പിന്നെ കണ്ണ് മിഴിക്കുമ്പോൾ നേരം പര പര വെളുത്തിരുന്നു . ഉണര്ന്നപ്പോഴാണ് പഴയതൊക്കെ ഓർമവന്നത്. ഞാൻ പെട്ടെന്ന് തന്നെ പിടഞ്ഞെഴുനേറ്റു . എന്റെ തൊട്ടടുത്ത് മഞ്ജുസ് സുഖമായി ഉറങ്ങുന്നുണ്ട്. ചുരുണ്ടുകൂടി കുഞ്ഞുങ്ങളെ പോലെയാണ് കിടത്തം . പുതപ്പു കഴുത്തോളം വലിച്ചു കയറ്റിയിട്ടുണ്ട്. നെറ്റിയിലിട്ട തുണി ഉണങ്ങി താഴെ വീണിട്ടുണ്ട് .
ഞാൻ അവളുടെ അവസ്ഥ എന്തെന്നറിയാൻ വേണ്ടി നെറ്റിയിൽ പതിയെ എന്റെ കൈവെള്ള ചേർത്ത് പിടിച്ചു . സാമാന്യം ചൂട് ഉണ്ടെങ്കിലും രാത്രിയിലേതുപോലെ വിറയൽ ഒന്നുമില്ല ! ഹോ..ആശ്വാസം !
